« Noverint universi ad quos littere iste pervenerint quod nemus de Autou commune est et omnis pastura nemoris, pro media portione, Comitis Perticensis1 et Capituli ecclesie Carnotensis2, sed vetitum prefati nemoris et custodia ad Comitem spectant. Preterea canonici ejusdem ecclesie, sine assensu Comitis, in jamdicto nemore ad usum suum nichil capere poterunt, preterquam ad fabricam ecclesie Carnotensis et ad usum duarum granchiarum, videlicet de Grandi-Husso et de Gardeis, ita quod tantumdem de nemore Comes capere poterit. Capitulum vero nec aliquid vendere inde vel donare poterit. Comes vero prefatum nemus ita vendere poterit quod priusquam vendatur, Comes venditionem Capitulo significabit ut illuc quem voluerit mittat qui intersit venditioni, et illi qui plus offeret vel meliorem offeret conditionem predictum nemus concedetur. Et hoc ita si in grossum nemus vendatur ; si vero ad forestagium ; per servientem Capituli et servientem Comitis vendetur, ab utroque serviente tam a Capitulo quam a Comite juratoria cautione recepta, et Capitulum medietatem precii consequetur. Item, Comes inde poterit dare et capere ; et quantum inde dederit vel acceperit, tantum Capitulum dare poterit vel accipere. Quantum autem ad pasturam vetitum nemoris Comes, intuitu elemosine, dimittit, ita quod in jamdicto nemore medietatem proventuum pasture Capitulum percipiet, eo tenore quod in ecclesia Carnotensi singulis annis celebrabuntur duo anniversaria, videlicet M[athildis]3, uxoris sue, scilicet iiii nonas januarii, et Amice4, comitisse, matris ejusdem comitis, in octabis Epyphanie. Canonicis autem qui predictis anniversariis5 interfuerint, predictum pasnagii et pasture emolumentum erogabitur, quod, in festo sancti Remigii, per servientem Capituli et servientem Comitis, colligetur, et ad minam dividetur, et uterque serviens tam Capitulo quam Comiti fidelitatem prestabit. Reliquam vero medietatem pasture Comes sibi et heredibus suis retinuit. Item institutum est et concessum quod undecumque animalia ad pasturam convenerint, sive de terra Comitis, sive Capituli, sive ejusdem Comitis militum, pastura vendetur, et quod inde perceptum fuerit Capitulo et Comiti communicabitur, ita quod neutra pars alicui in eadem pastura poterit dare immunitatem nisi de communi assensu Capituli et Comitis. Datum anno gracie MºCº nonagesimo, xii kalendas julii. »