« Innocentius, episcopus, servus servorum Dei, dilectis filiis decano et Capitulo Carnotensi, salutem et apostolicam benedictionem. In nostra presentia constitutus venerabilis frater noster episcopus Carnofensis, pro animabus tam sua quam predecessorum et successorum suorum, hospitali Sancte-Marie-in-Saxia1, de voluntate nostra, prebendam in ecclesia Carnotensi, ad opus infirmorum et pauperum, pia liberalitate concessit, et nos concessionem ipsius, nomine hospitalis ejusdem, recepimus et auctoritate curavimus apostolica roborare ; decernentes irritum et inane si quid de prebenda, vel nunc vacante, vel in proximo vacatura, contra hoc, quod non credimus, fuerit attemptatum. Ne autem ex hoc ecclesia vestra solito servitio defraudetur, pastorali volentes sollicitudine providere, volumus et presentium auctoritate concedimus ut, juxta dispositionem ipsius episcopi, aliquis statuatur qui pro ea deserviat et in ea ecclesie Carnotensi terciam partem proventuum ejusdem prebende in integrum percepturus, duabus reliquis hospitali supradicto, annis singulis, in integrum persolvendis2. Ideoque discretioni vestre per apostolica scripta mandamus et precipimus quatinus quod ab eodem episcopo factum est intuitu pietatis et a nobis auctoritate apostolica confirmatum, gratum habeatis et ratum et inviolabiliter observetis, vestrumque consensum per patentes nobis curetis litteras intimare. Alioquin noveritis nos eidem, et venerabili fratri nostro Aurelianensi episcopo, et dilecto filio abbati Vindocinensi mandasse ut vos ad ea, monitione premissa, per censuram ecclesiasticam, appellatione remota, compellant. Datum Anagnie, iiii idus novembris, pontificatus nostri anno quarto. »