« Ego Ludovicus, comes Blesensis et Clarimontis, omnibus, tam futuris quam presentibus, notum facio quod comes Theobaldus, Francie senescallus, dominus et karissimus pater meus digne memorie et felicis, pro remedio anime sue et antecessorum suorum, unum cereum, in Carnotensi ecclesia, ante sacrosanctam capsam beatissime Virginis Marie, perpetuo arsurum stabilivit ; pro cujus cerei dispensatione et sumptibus faciendis matriculariis ejusdem ecclesie clericis contulit et in perpetuum habere concessit v modios frumenti et c solidos carnotenses, quos c solidos Capitulum Carnotense, ei et heredibus suis, pro bannia quam habebat in quibusdam villis Beate-Marie, debebat annuatim, in crastino Purificacionis beate Marie reddendos, ita quod, nisi ipso dicto die redderentur, liceret ei et heredibus suis de rebus Capituli eo usque capere quousque dicta summa cum emendatione reddita fuisset, quos etiam eodem termino, eadem integritate qua ipse solebat percipere capiendos matriculariis assignavit ; quinque autem modios frumenti in molendino de Culeto, in octabis beati Remigii, recipiendos, eadem mensura et eodem modo a molendinariis ejusdem molendini in horrea matriculariorum vehendos quo residuum ejusdem molendini in horrea sua et antecessorum suorum solebat deferri. Quod si forte molendinum supradictum deterire vel omnino perire contingeret, quominus inde percipi possent quinque modii frumenti, sicut prenotatum est, voluit idem dominus pater et concessit ut in horreis suis, Carnoti, tantumdem frumenti, eodem termino, perciperent matricularii. Ego autem hanc donationem et donationis constitucionem a bono patre meo pie ac devote factam, pro remedio anime mee et anime sue remedio et antecessorum nostrorum, laudantibus et concedentibus Katherina1, uxore mea, filiis meis, Theobaldo2 et Radulfo3, et filia mea Johanna4, et Philippo5 fratre meo, volui et concessi. Quod ut ratum firmumque permaneat, sigilli mei auctoritate firmavi. Actum Carnoti, anno gratie millesimo ducentesimo primo. »