« Ego Nivelo1, dominus Fractevallis, notum facio presentibus et futuris quod dilectus et fidelis meus Hugo de Vilais, miles, in presentia mea constitutus, confessus est se, assensu Eramburgis uxoris sue et filiorum suorum Jocelini, Symonis, et filiarum suarum Johanne, Agnetis, Eremburgis, et Aeline, et Odoini fratris sui, et Marie sororis sue, vendidisse Capitulo Carnotensi campum unum terre, quem habebat in territorio de Vilais, in loco qui vocatur Versus Novum-Vicum, qui fuit Hemmardi2 ; qui campus, ad perticam Capituli, continet decem et novem sextarios semeure terre ; ita quod idem H[ugo], miles, quadraginta septem libras et decem solidos parisienses habuit a Capitulo nomine emptionis. Capitulum eidem H[ugoni] et ipsius heredibus pro prefato campo reddet annui census, in festo sancti Remigii, solummodo tres solidos parisienses sine omni alia obnoxietate et justicia. Ego vero, de cujus feodo dictus H[ugo] miles prefatum campum tenebat venditionem supradictam ratam habeo, volo, laudo, guarandire promitto et presenti scripto et sigilli mei munimine confirmo ; ita quod si dictus H[ugo], miles, in aliquo mihi forefaceret, non campum dictum, sed illos tres solidos census solummodo possem saisire. Quod ut ratum firmumque permaneat, presentes litteras sigilli mei munimine feci roborari. Actum anno gracie millesimo CCº sexto, mense decembri. »