« Willelmus, decanus, et universitas Capituli Carnotensis, universis Christi fidelibus presentis scripti paginam inspecturis, salutem in eo qui salus est omnium. Universitati vestre notum fieri volumus quod Ivo de Aqua, miles, coram nobis, in communi capitulo constitutus, vendidit nobis majoriam suam de Landellis, precio quinquaginta trium librarum. Ad hoc autem presens existens dilectus frater et concanonicus noster Milo de Garneio a nobis petiit hoc mercatum sibi concedi, ad anniversarium suum in nostra ecclesia faciendum1. Cujus petitioni acquiescentes, illud ei concessimus, tali modo quod canonici qui prefuerint dicto loco quinquaginta solidos, singulis annis, quoad vixerit, in festo Omnium-Sanctorum, ei solvent ; post autem ejus decessum, reddent eos, annuatim canonicis hujus ecclesie qui ejus anniversario intererunt distribuendos. Quod ut ratum permaneat, presentem cartulam inde notari fecimus et sigilli nostri appositione muniri. Actum anno gratie MºCCºVIIº. »