« Ego Gaufridus, dominus de Illeriis1, notum facio omnibus presentibus et futuris quod totam emptionem quam vir venerabilis Henricus, Dunensis archidiaconus, fecit quondam a Huberto Viario, milite2 apud Marchesvillam, et quicquid idem Henricus circa Marchesvillam emit quod de meo sit feodo, ego, tanquam dominus feodalis, laudavi et concessi, et garandizandam in perpetuum manucepi, et ab omni omnium hominum violentia defendendam, quamdiu ipse archidiaconus, aut ecclesia Carnotensis cujus nomine ea possidet, non negaverit de eisdem emptionibus ubi debuerit stare juri. Ad quod siquidem laudandum et concedendum, ea precipue ratio me induxit quod de testimonio bonorum virorum didici, quorum super hoc juramenta recepi, Willelmum de Ilerio, patrem meum, cujus anima in benedictione quiescat, predictas concessisse emptiones suo tempore, et easdem, de sua voluntate et assensu, fuisse Carnotensi ecclesie in perpetuam elemosinam assignatas. In cujus rei memoriam et perpetuam firmitatem, presens scriptum feci sigilli mei impressione signari. Actum anno Domini MºCCº decimo, mense augusto. »