« Ego Johannes1, comes Vindocinensis, universis tam presentibus quam futuris notum facio quod, cum inter predecessores meos comites Vindocinenses, ex una parte, et Capitulum Carnotense et specialiter prepositos de Masengeio, ex alia, super majore justicia de Masengeio, videlicet : homicidio, furto, duello et raptu, diu habita fuisset contentio, ego tandem, mihi jure Capituli declarato, pro anime mee et antecessorum meorum remedio, si quid juris habebam in rebus predictis, aut aliis apud Masengeium, aut in territorio ei adjacente, de assensu Marie2, uxoris mee, sororis comitis Sancti-Pauli, illud penitus bona fide in perpetuum quitavi Capitulo Carnotensi, et titulo elemosine illud super altare beate Marie optuli in ecclesia Carnotensi, ibidem astante et assensum prebente domino et patre meo Raginaldo, episcopo Carnotensi, et multis aliis ejusdem ecclesie canonicis et personis ; ita etiam quod eundem episcopum, cujus hominem me esse confiteor feodalem, plegium constitui erga Capitulum supradictum de illo facto meo inviolabiliter observando. Pro hujus siquidem quitationis remedio, dicti canonici Carnotenses anniversarium meum et patris mei in ecclesia Carnotensi annuatim tenentur celebrare. Ego autem in Masengeio et toto territorio appendente aut in hominibus, tantummodo hec retinui, scilicet : quod homines de Masengeio, pro necessitate mea, castro meo Vindocino reddent custodiam, et si tandem in expeditionem fecerim iter per villam de Masengeio personaliter, propriam personam meam sequentur, ita etiam quod eodem die quo moti fuerint poterunt ad propria remeare, et costumam communem eorumdem hominum de Masengeio [reddent] quam antea semper pacifice reddere consueverunt. Hujus rei testes sunt : Philippus, celarius Sancti-Mauricii Turonensis ; Odo, canonicus ejusdem ecclesie ; Willelmus, capellanus episcopi Carnotensis et canonicus Carnotensis ; Willelmus de Capella, canonicus Carnotensis ; magister Stephanus, presbyter de Vi ; magister Johannes Cerarii ; Petrus de Saluce ; Nicholaus Cardinalis ; Radulfus, magister Leprosorum Vindocinesium ; Gaufridus Rousel ; Willelmus de Corseraut ; Gaufridus de Cremise, milites ; et magister Robinus viarius. Ut hoc autem factum meum perpetuam firmitatem obtineat, presentem paginam sigilli mei robore roboravi. Actum publice apud Vindocinum, anno dominice incarnationis MºCCº tercio decimo, mense septembri. »