« B[artholomeus], et universitas Capituli Carnotensis, salutem in Domino. Noverit universitas vestra quod nos viro venerabili J[ohanni], cantori Aurelianensi, precariam de Bertonvillare a nobis tenenti, concessimus, quoad vixerit, approbantibus et assensum prebentibus venerabilibus patribus et concanonicis nostris Gosleno cantore, Bartholomeo subdecano, et Willelmo de Capella, illius loci tunc prebendariis, omnem campipartem quam debebat nobis ex terra predicte precarie1, pro annua modiatione sex modiorum, medietate de communi annona et medietate de avena, ad mensuram carnotensem, infra festum Omnium-Sanctorum annuatim solvendorum ; ita quod predictus cantor Aurelianensis adducet, Carnotum, in domo prebendariorum qui pro tempore fuerint, quatuor modios, hospites Beate-Marie de illo territorio residuum. Si autem hospites illi contra predictum cantorem Aurelianensem evincere poterunt quod totam campipartem debeat idem cantor Aurelianensis adducere Carnotum, ipse cantor Aurelianensis totos sex modios adducet Carnotum. Qui, si ad terminum eos non solveret, postea redderet cum emenda, et super hoc haberent prebendarii dicti loci regressum ad terram ipsam et ad ea que invenirent in terra, donec esset eisdem satisfactum. In cujus rei robur et testimonium, presentes litteras sigilli nostri fecimus muniri. Actum anno Domini MºCCº septimo decimo, mense julio. »