« Universis Christi fidelibus presentes litteras inspecturis, Stephanus, decanus Magdunensis, et magister Henricus, officialis Carnotensis, salutem in Domino. Noverit universitas vestra quod cum contentio esset inter venerabilem Carnotensem episcopum ex una parte et viros venerabiles Stephanum, archidiaconum Carnotensem, G[uillelmum] Dunensem, Thomam Pissiacensem, Johannem Blesensem, Jacobum Drocensem et Hugonem Vindocinensem archidiaconos ex altera, super eo quod dictus episcopus dicebat causas matrimonii et sacrilegii ad se pertinere, et super eo quod idem episcopus dicebat duas partes honorum eorum qui decedunt intestati ad suam, tertiam vero partem ad archidiaconorum distributionem pertinere, et super eo quod idem episcopus dicebat se habere duas partes in emendis archidiaconorum, dictus episcopus, in verbo veritatis, et dicti archidiaconi, fide corporaliter prestita, promiserunt qnod dicto ordinationis nostre starent super controversiis memoratis. Nos autem, pro bono pacis, habito prudentium virorum consilio, ordinavimus in hunc modum : in primis dicimus quod si agitur ad divortium super matrimonio jam contracto, totalis causa ab initio ad episcopum pertinebit1 : alie cause matrimonii et sacrilegii archidiaconis remanebunt. Due partes bonorum eorum qui decedent intestati ad episcopi, tertia pars ad archidiaconorum distributionem pertinebunt, in eo salvo jure et libertate quod archidiaconi et episcopus ipse in servientibus et sociis suis habent. In emendis autem archidiaconorum episcopus nihil habebit, nec archidiaconi in emendis episcopi aliquid habebunt. In cujus rei testimonium, presens scriptum sigillis nostris, ad petitionem partium, fecimus sigillari. Actum anno gratie MºCCºXXº tercio, mense decembri2. »