« Ludovicus, Dei gratia, Francorum rex, notum facimus quod cum jamdudum questio mota esset super feodum castri Montis-Duplelli et pertinentiarum ipsius, de quo dilectus et fidelis noster Gauffridus1, vicecomes Castridunensis, fecerat, ut dicebatur, homagium clare memorie regi Philippo avo meo et postmodum inclite recordationis regi Ludovico genitori nostro ac demum nobis ; quod feodum Petrus, comes Vindocinensis, ad se de jure pertinere dicebat et se tenere illud a dilecto et fideli nostro episcopo Carnotensi, cum aliis que ab episcopo tenet in feodum, et idem comes Vindocinensis et etiam dilectus et fidelis noster episcopus Carnotensis instanter peterent a nobis quod dictum homagium et feodum eidem Comiti Vindocinensi redderemus, tandem, de assensu karissimi fratris et fidelis nostri Karoli, comitis Andegavensis, P[etri], comitis Vindocinensis, et episcopi et Capituli Carnotensis, super hiis compositum est in hunc modum : quod dictus vicecomes Castriduni et heredes sui castrum Montis-Duplelli, cum pertinentiis ejus, de cetero tenebunt in feodum a dicto fratre nostro comite Andegavie et heredibus ejus, ad cujus comitatum dictum feodum pertinere dicebatur. Idem autem frater noster comes Andegavie et heredes ipsius dictum feodum tenebunt a nobis et heredibus nostris regibus Francie, cum alio feodo quod de nobis tenet idem comes Andegavie, frater noster. Et nos in recompensationem juris, si quod habet comes Vindocinensis in predictis, eidem comiti Vindocinensi dedimus mille libras. Supradictus etiam comes Andegavensis, frater noster, in recompensationem juris episcopi et ecclesie Carnotensis, si quod habebant in dicto feodo Montis-Duplelli, de assensu et voluntate nostra, voluit et concessit quod villa que dicitur Ruppes-Episcopi, cum ejus pertinenciis, que dictus comes Vindocinensis tenebat in feodum a dicto comite Andegavensi, fratre nostro, cum aliis que tenet ab ipso, cedant in feodum episcopi Carnotensis im perpetuum ; ita quod comes Vindocinensis et heredes sui. semper de cetero teneant dictam villam de Ruppibus, cum pertinentiis ejus, ab illo quicumque pro tempore fuerit episcopus Carnotensis, cum aliis que ipse comes Vindocinensis tenet ab episcopo memorato. In cujus rei testimonium, sigillum nostrum presentibus litteris duximus apponendum. Actum Parisius, anno Domini MºCCº quadragesimo octavo, mense junio2. »