« Omnibus presentes litteras inspecturis, magister Petrus de Taaris, cancellarius ecclesie Carnotensis, magister Guillelmus de Alneto, magister Petrus de Castra, Manaserius de Galendra, magister Hugo de Fonte-Betonis, Raginaldus de Bello-Monte, Hugo de Chaverneio, magister Petrus de Fontaneto, canonici Carnotenses, salutem in Domino. Noveritis quod cum venerabilis vir magister Raginaldus, dictus Carum-Tempus, concanonicus noster, peteret in jure, coram officiali Carnotensi, a preposito Carnotensi recredentiam sibi fieri Hodeardis, uxoris Pabuerii carpentarii, Guillelmi Anglici, Radulfi Gramart, Robini Houdouin, hospitum dicti magistri, commorancium in Clauso-Erardi, in quo loco idem magister habet omnimodam juridicionem secularem, ut dicitur ; quos hospites dicti magistri idem prepositus ceperat seu capi fecerat vel per fidem suam astrinxerat de redeundo in jussionem domine Comitisse Carnotensis, ad mandatum ipsius prepositi, occasione cujusdam latronisse quam dictus magister ceperat seu capi fecerat in Clauso-Erardi et detinebat, tamquam ejusdem loci justiciarius secularis, die jovis post purificationem beate Marie virginis, constitutis in jure coram officiali Carnotensi, nobis et aliis bonis presentibus, predicto magistro ex una parte et predicto preposito Carnotensi ex altera, idem prepositus dictos hospites a fide qua eidem preposito tenebantur, occasione captionis predictorum hospitum dicti magistri, coram officiali predicto et nobis, liberavit et quitavit et ab omni alia obligatione qua eidem preposito tenebantur, ratione captionis predicte femine, per eumdem prepositum vel ejus mandatum, similiter absolvit penitus et quitavit1. Et hoc vidisse et audivisse testificamur. In cujus rei testimonium, presentes litteras sigillis nostris dignum duximus sigillandas. Datum anno Domini MºCCº quinquagesimo, die jovis predicta post Purificationem beate Marie virginis. »