« Clemens, episcopus, servus servorum Dei, venerabili fratri archiepiscopo et dilectis filiis priori Sancti-Ursini ac decano Bituricensi, salutem et apostolicam benedictionem. Sua nobis dilecti filii decanus et Capitulum ac Arnulfus de Berivilla, canonicus Carnotensis, petitione monstrarunt quod cum ipsi nobilem virum Johannem, comitem Blesensem, Ysimbardum de Sancto-Deodato, ballivum, et Johannem de Molendinis, castellanum civitatis Carnotensis, laicos, super quibusdam equis, pecuniarum summis et rebus aliis, coram magistro Guidone de Torota et Johanne de Miliaco, canonicis Carnotensibus, quibus subdecanus Carnotensis, ad quem, de antiqua et approbata et hactenus pacifice observata consuetudine, hujusmodi causarum cognitio in civitate et banleuga Carnotensi ubi partes consistunt pertinet, hujusmodi causam commiserat, non ex delegatione apostolica communiter traxissent in causam iidem canonici, perperam in causa hujusmodi procedentes contra decanum, Capitulum et Arnulphum predictos diffinitivam sententiam promulgarunt iniquam, a qua ipsi ad nostram audientiam appellarunt. Quocirca discretioni vestre, per apostolica scripta, mandamus quatinus, legitime in appellationis causa procedentes, sententiam ipsam confirmare vel infirmare, appellatione remota, curetis, sicut de jure fuerit faciendum. Quod si non omnes hiis exequendis potueritis interesse, tu, frater archiepiscope, cum eorum altero, ea nichilominus exequaris. Datum Viterbii, v kalendas februarii, pontificatus nostri anno tercio. »