« Universis presentes litteras inspecturis, Matheus divina miseratione Carnotensis episcopus, salutem in Domino. Noveritis quod de sexaginta solidis annui redditus, quos percipit et habet diu est prior de Sparnone nomine prioratus sui per manum presbiteri de Hanchiis in ecclesia de Hanchiis que ad patronatum dicti prioris pertinet terminis inferius notatis, videlicet ad pascha domini, viginti solidos et ad festum omnium Sanctorum viginti solidos et ad natale domini viginti solidos, prout confessus fuit Dionisius presbiter de Hanchiis coram nobis : eidem Dionisio quamdiu erit persona dicte ecclesie relaxat dictus prior quadraginta solidos pro servitio eidem priori et prioratu de Sparnone a dicto Dionisio impenso. Qui quadraginta solidi debebunt solvi annuatim eidem priori a dicto presbitero ut dictum est hiis terminis videlicet ad pascha domini viginti solidi, et ad festum omnium Sanctorum viginti solidi, non eo animo quod aliis presbiteris qui pro tempore erunt in dicta ecclesia de Hanchiis post dictum Dionisium instituti per dictam relaxationem possit aliquando jus acquiri, nec quantum ad proprietatem seu possessionem. Inmo postquam contigerit dictum Dionisium dictam ecclesiam quoquo casu dimittere, vel ipsum viam universe carnis intrare, rectores ecclesie de Hanchiis qui post dictum Dionisium in eadem ecclesia erunt instituti, priori de Sparnone qui pro tempore erit dictos quadraginta solidos qui solvi debebant ad terminos supradictos scilicet, viginti solidos ad Pascha domini, et viginti solidos ad festum omnium sanctorum, una cum aliis viginti solidiis solvendis dicto priori nomine annui redditus, ad natale domini prout superius dictum est, annuatim solvere tenebuntur. Nos vero ad confirmationem premissorum et ad requisitionem dicti prioris de Sparnone et dicti Dionisii presbiteri de Hanchiis presentes litteras sigillo nostro fecimus sigillari. Datum anno domini Mº CCº XLº nono, mense octobri. »