« A tous ceulx qui ces présentes lettres verront, Mathurin Bouffureau, licencié en loix, bailly de Galardon, salut. Savoir faisons que par devant Denys Durant, clerc tabellion juré de la chastellenie d'icelui lieu, vint et fut présent noble homme messire Jehan d'Angennes, chevalier, seigneur de Ramboillet : lequel congnut et confessa lui avoir prins à ferme comme personne estrange, pour ceste présente année mil quatre cens soixante quinze, de religieuse et honneste personne frère Clément de Saint Lomer, prieur du prieuré d'Espernon, membre deppendant de l'abbaye de Mèremoustier, qui pareillement a baillé audit chevalier, pour ceste dicte présente année, toutes et chascune les grosses dismes tant de blez, d'avoynes, que autres grains appartenans audit prieur ès parroisses et terrouers de Ramboillet et Gazeran, telles que ledit prieur a acoustumé prandre et avoir chascun an ès dites parroisses, pour le prix et quantité de unze muys de grain, les deux pars blé et le tiers advoyne et unze livres de cire, que ledit chevalier en sera tenu et a promis par la foy et serment de son corps rendre et paier audit prieur dedens Noël prochain venant, le tout rendu en la ville de Chartres, à la mesure du lieu. Et sur ce promist ledit chevalier rendre et paier tous coutz, fraiz, mises, dommaiges, interestz et despens que ledit prieur pouroit avoir et soutenir par deffault de paiement desdits unze muys de grain et unze livres de cire au terme dessus dict, sur lesquelz le porteur de ces lettres sera creu sur son simple serment, sanz autre preuve faire. Et quant à ce ledit chevalier obliga audit prieur et soubzmist du tout à la jurisdiction du chastel de Galardon et à toutes autres, lui, ses hoirs... etc. Donné soubz le scel de ladite chastellenie de Galardon le jeudi xiii^e jour de juillet, l'an de grâce mil CCCC soixante quinze. »