« Cejourdhuy troisiesme jour d'Apvril l'an mil cinq cens soixante et quatre après Pasques, est comparu devant nous Toussainet Menu, lieutenant général et juge prévostal civil et criminel du bailliage de Rambouillet au lieu de Montorgueil, heure de dix heures du matin, comme il nous a esté certiffié par Estienne du Tertre et Symon Godard et aultres y estans, honneste homme M^re Hector Pérot, procureur de noble homme maistre Philippe Hurault, conseiller du Roy nostre sire et maistre des requestes ordinaire de son hostel, prieur du prieuré monseigneur Sainct Thomas d'Espernon, fondé de lettres de procuracion des quelles la teneur ensuit : A tous..... Anthoine Duprat.... garde de la prévosté de Paris... par devant Loys Le Gendre et Pierre Poutrain, notaires du Roy... fut présent noble homme M^re Philippe Hurault... lequel a fait et constitué... son procureur général M^re Hector Pérot auquel il a donné et donne pouvoir et puissance de présenter, bailler et deslivrer doresnavant au seigneur de Ramboullet le gasteau que ledit seigneur constituant, à cause de sondit prieuré est tenu présenter par chascun an le lundi des féries landemain du jour de Pasques audict seigneur de Ramboullet à cause de son fief de Montorgueil, au lieu acoustumé à ce faire qui est dedans le parc de Ramboullet appellé Montorgueil, en telle sorte et ainsy qu'il est acoustumé et requis en ce cas, et de ladicte présentation prandre et retirer acte et instrumanz pour servir audict seigneur constituant ce que de raison ; et générallement faire dire, procurer et besongner en tout ce que dict est dessus comme feroict et faire pourroict ledict constituant si présent en personne y estoict..... lan mil cinq cenz soixante et deux le septiesme jour de mars.

Seigné Le Gendre. — Pautrain. »

Sellé de cire vert sur double queue.

« Lequel Pérot en vertu de ladicte procuration, monté sur ung cheval blanc scellé et briddé en selles et briddes bonnes, aiant ledict homme une espée d'armes au costé, des gandz neufs aux mains, une serviette dessoubz ung gasteau, ung chappeau de pervanche sur la teste, ung gasteau de la fleur d'un mynot de fourmant ledict gasteau carnellé et ung flacon de vin contenant ung pot. Et a icelluy Pérot crié par trois fois à haute voix monseigneur de Montorgueil ! monseigneur de Montorgueil ! monseigneur de Montorgueil ! disant oudict seigneur de Montorgueil en personne, ou aultre aiant puissance dudict seigneur, qu'il est comparu pour offrir et de faict bailler audict seigneur de Montorgueuil ledict gasteau et pot de vin que ledict seigneur prieur à cause de sondict prieuré, doict par chacun an à tel jour que se jourdhuy à mondict seigneur de Montorgueil. Et lequel gasteau et pot de vin il a offertz aux lieux dessus dicts. A ce est comparu honorable homme M^re André Blanchouyn, procureur fiscal de monseigneur de Montorgueil, lequel a esté d'acord du redebvoir que à faulte de se présenter et comparoir à heure deue en ce mesme équipage que dessus, c'est assavoir que ledict prieur ou son procureur luy doict à heure de huict heures du matin à cause de sondict prieuré d'Espernon, à mon seigneur de Ramboullet à cause de sa seigneurie de Montorgueil, ung gasteau par chascun an le landemain de Pasques, ledict gasteau de la fleur d'un boisseau de froument et doibt estre carnellé, avecques ung pot de vin et icelluy qui le présente doict estre monté sur ung bon cheval bien scellé et briddé et bien ferré, et sy luy deffaut fer ne clou ledict cheval est acquis et confisqué à monseigneur ; doict avoir cest homme qui la présante une espée au costé, des gandz blancqz et neufz aux mains, une lasure ou serviette blanche et honneste saincte en escharpe, ung chappeau desparvanche sur la teste, et s'il deffault à aucune des choses dessus dictes, monseigneur comme seigneur de Montorgueil, Gayville et la Bretonnière, peut et luy est loysible comme à luy appartenans acquérir et confisquer la disme de sesdictz Montorgueil, Gaiville et la Bretonnière pour l'année sans en payer ne faire auculne chose audict prieur ou l'une des choses dessus dictes en leur disme de Gaiville, Montorgueil et la Bretonnière déppandant dudict prieuré sont acquises et appartiennent à mondit seigneur. Et pour ce que ledict Pérot cest callifié procureur au sieige d'Espernon, que ledict prieur ou procureur pour luy n'est comparu à heure de huict ny de neuf heures et aussy que ledict Perrot qui c'est efforcé faire ladicte offre n'avoit ladicte serviette en escharpe ains sur les bras sur lesquels ledict gasteau estoit pausé, qu'il ne entendoit faire autrement recepvoir pour ceste année desdictz gatteau et pot de vin et au contraire qu'il entendoit pour ceste année pour mondict seigneur de Ramboullet et de Montorguiel (sic) lesdictes dismes de Gaiville, Montorgueil et la Bretonnyère dont aux dictes partyes se requérant avons ordonné et octroyé acte. Et davantaige ledict Pérot de ce quil ce dict estre procureur général de mondict seigneur le prieur fondé de lettres de procuration. Ce faict, ledict Pérot a persisté sans préjudice des droicts des partyes ou cas que monseigneur en voulsist faire débaz. Ce que monsieur le procureur a accordé sans préjudice desdicts droitz. Dont et des quelles choses cy dessus avons donné et octroyé acte pour luy servir et valloir en temps et lieu ce que de raison. Et néantmointz ordonnons que sans préjudice desdicts droictz... ledict gasteau sera receu1... »

« DE RIEULX. »