« Lan mil cinq cens soixante cinq après Pasques, le vingt-troisiesme jour d'apvril, sont comparuz par devant moy Jacques de Rieux, greffier du bailliage de Rambouillet soubz signé, au lieu seigneurial de Montorgueult, heures de dix heures du matin, honneste homme M^e Hector Pérot, soy disant procureur de maistre Philippe Hurault, conseiller du Roy nostre sire, maistre des requestes de son hostel, prieur du prieuré monsieur Saint Thomas d'Espernon, lequel Pérot estant monté sur ung cheval scellé et bridé, ayant ledict Pérot une espée d'armes, des gandz neufs en ses mains, une thouelle blanche, ayant ung gasteau carnellé à l'entour d'icelluy et ung chappeau de parvanche, comme aussy il en avoict ung à l'antoure de son chappeau ; ledict gasteau estant de la fleur d'un boisseau de blé et ayant aussy ung flacon plain de vin ; Ou illeques ledict Pérot par troys diverses foys à haulte voix a appellé le seigneur de Montorgueil ou procureur pour luy ayant puissance de recepvoir ladicte foy et hommage que à pareil jour ledict prieur de Sainct Thomas d'Espernon est tenu faire au seigneur de Montorgueil de la sorte que dessus, à ce estant audict lieu de Montorgueil M^e André Blanchevyn, procureur fiscal dudict seigneur de Montorgueul qui a dict qu'il estoict audict lieu de Montorgueul pour recepvoir ledict debvoir et que ly faisant apparoir par ledict Pérot de procuration espécialle dudict prieur pour faire tel hommaige à mondict seigneur estoict prest recepvoir ledict hommaige estant deuement faict sellon qu'il est tenu faire..... etc. »