Contrat de donation de 800livres, par la reine Anne d'Autriche, pour la fondation d'une messe quotidienne.

Par devant Louis Gossuin et Bernard Mousnier, notaires garde-nottes du Roy au Chastelet de Paris soubzsignez, furent présentes :

Très haulte, très illustre, très excellente et tres puissante princesse, Anne, par la grace de Dieu, reyne de France et de Navarre, mère du Roy, d'une part,

Et révérendes et dévotes religieuses illustre princesse Françoise de Lorraine, abbesse de l'abbaye royalle de Montmartre près Paris, dame dudit Montmartre, des Porcherons, du Fort-aux-Dames et autres lieux, sœurs Margueritte L'Anglois, prieure à Montmartre, Magdelaine Picart, prieure aux Sainctz-Martyrs, Catherine Poulet, prieure du cloistre à Montmartre, Marie Benoist, prieure du cloistre aux Martyrs, Marguerite de Coulange, soubz-prieure de Montmartre, Françoise Benoist, soubz-prieure des Sainctz-Martyrs, Louise de Morges, portière, Marguerite Ferrand, célérière à Montmartre, Charlotte de Chaulnes, secrétaire du chapitre, Claude de Seve, boursière, et Margueritte Bourdet, célérière des Sainctz-Martyrs, touttes relligieuses professes de ladicte abbaye de Montmartre, assemblées au son de la cloche en forme de chapitre, ainsy qu'il est accoustumé, au devant de la grille du parloir de ladicte dame abbesse, au prieuré des Saintz-Martyrs, annexe inséparable, dépendant et estant dans l'enclos dudit monastère, d'autre part.

Disant madicte dame Reyne, que ayant receu en une infinité d'occasions des marques visibles de la bonté divine sur sa personne et sur cet estat par l'intercession du glorieux sainct Denis qui en est l'apostre et le protecteur, et particulièrement au recouvrement de la santé du Roy son fils, lors de la grande et périlleuse maladie dont il fust affligé en la ville de Calais, en l'année mil six cens cinquante sept, et désirant laisser, à la postérité des marques de sa recognoissance, et des sentimens qui luy en restent, et attirer à l'advenir la continuation des graces célestes sur ce royaume et sur les princes et princesses de la famille royalle, Sa Majesté auroit résolu de fonder en l'Eglise de ladicte abbaye de Montmartre une messe basse chacun jour de l'année à perpétuité, pour estre dicte et célébrée en la basse chappelle de sainct Denis par un chapelain actuel et ordinaire, au choix et nomination de ladicte dame abbesse et ses successeurs abbesses en ladicte abbaye, depuis sept jusques à huict heures du matin, après qu'elle auroit esté tintée un temps suffisant pour en advertir les habitans du lieu et des environs et les passans pour se rendre en ladicte chapelle, si bon leur sembloit, et une lampe ardante jour et nuit aussy à perpétuité en ladicte basse chapelle ; et pour l'entretènement de ladicte fondation, madicte dame Reyne auroit destiné huict cens livres de rente chacun an pareillement à perpétuité sur le revenu du domaine de Calais qui luy a este délaissé par le roy pour partye de son douaire et de ses deniers dotaux, dont le payement seroit faict en cette ville de Paris par les fermiers présens et advenir dudit domaine entre les mains et soubz les quittances de ladicte dame abbesse et ses successeurs, en deux termes égaux, à la charge que lesdites dames abbesse et relligieuses et leurs successeurs seroient tenues et obligées de gager et entretenir ledict chapelain, de fournir d'ornemens convenables, de luminaire, pain, vin, et autres choses nécessaires pour ladicte messe, et d'huisle et mesche pour ladicte lampe, comme aussy de lampe quand besoin seroit, et après que la lampe d'argent dont madicte dame Reyne a faict présent au subjet de ladite fondation viendroit à manquer, le tout à perpétuité. Et afin que le payement desdictes huit cens livres de rente chacun an fust plus certain et asseuré, Sa Majesté se chargeroit de le faire consentir et agréer par le roy par lettres patentes qui seroient vérifiées et registrées en la chambre des Comptes aux frais de madicte dame Reyne ; et ayant ladicte dame abbesse et religieuses esté informées de la pieuse intention de Sa Majesté, elles lui auroient tesmoigné qu'elle leur faisoit grand honneur, et asseuré qu'elles estoient prestes de satisfaire à ses volontez, et d'en passer contract toutes fois et quantes qu'il plairoit à madicte dame Reyne, et mesmes auroient commencé à faire dire et célébrer ladicte messe dès le premier jour du présent mois, en conséquence de quoy, madicte dame Reyne et lesdictes dames abbesse et religieuses sont demeurées d'accord des conditions suivantes :

C'est à sçavoir que lesdites dames abbesse et religieuses se sont par ces présentes chargées et obligées, tant pour elles que pour leurs successeures en ladicte abbaye et monastère de Montmartre, de faire dire et célébrer en leur église en ladicte basse chapelle de sainct Denis, par un chapelain actuel et ordinaire, qui sera choisi et nommé par ladicte dame abbesse et ses successeures abbesses en ladite abbaye à tousjours, ladicte messe basse chacun jour de l'année à perpétuité, depuis sept jusques à huit heures du matin, après qu'elle aura esté tintée un temps suffisant pour en advertir les habitans dudit lieu et des environs et les passans, afin qu'ils se rendent en ladite chapelle si bon leur semble pour ouir ladicte messe, laquelle sera tenue et réputée de fondation royalle, et d'entretenir ladicte lampe ardante, jour et nuict, en ladicte basse chapelle de sainct Denis, gager et entretenir ledit chapelain, fournir d'ornemens convenables, luminaire, pain, vin, huisle et mesche pour ladicte lampe, comme aussy de lampe, celle dont madicte dame Reyne a faict présent au subject de ladicte fondation, qui est d'argent, venant à manquer, et toutes autres choses nécessaires pour l'entretènement et exécution de ladicte fondation, le tout à perpétuité.

En considération de laquelle fondation, et pour donner moyen à ladicte abbaye et monastère de Montmartre de l'entretenir et y satisfaire, madicte dame Reyne a destiné et par ces présentes donné à icelle abbaye et monastère la somme de huict cens livres par chacun an, aussy à perpétuité, à prendre et assigner spécialement sur ledit revenu du domaine de Calais, laquelle somme sera payée par les fermiers présens et advenir d'iceluy en ceste ville de Paris, entre les mains et soubs les quittances, de ladicte dame abbesse et de ses successeures abbesses en ladicte abbaye et monastère, en deux termes égaux, sçavoir, Pasques et Sainct-Remy, six semaines après chacun terme escheu, dont le premier terme escherra au jour de Pasques de l'année prochaine mil six cens soixante-trois, et sera payé six semaines après, et ainsy continué à tousjours, lesditz termes étant ceux auxquels est ordinairement payable la ferme dudit domaine de Calais, sans que ledit payement puisse estre reculé et retardé, ny ladicte somme de huict cens livres divertie ou diminuée, soubs quelque prétexte que ce soit, attendu la juste cause pour laquelle elle est accordée et donnée. A l'effet de quoy icelle somme sera employée en la despense des estats des charges assignées sur ledit domaine, qui s'expédiera chacun an, au chapitre des fiefs et aumosnes, et ledit don et assignat consenty et agréé par le roy par lettres patentes que madicte dame Reyne se charge de faire incessamment registrer et vérifier à ses frais et dilligences, en ladicte chambre des Comptes.

Et afin que ladicte fondation soit en mémoire perpétuelle, Sa Majesté la pourra faire inscrire en substance sur bronze, cuivre ou marbre à son choix, et appliquer à tel endroit qu'elle désirera de ladicte basse chapelle de sainct Denis, aux frais et despens de sadicte Majesté, et outre lesdictes dames abbesse et religieuses en feront mention sur le livre de leur martirologe.

Promettans et obligeans chacun endroit soy, renonçans etc.

Faict et passé à l'esgard de madicte dame Reyne au chasteau de Sainct-Germain-en-Laye, et pour lesdictes dames abbesse et religieuses à la grande grille et parloir de leur dit monastère, l'an mil six cens soixante-deux, le dernier jour de juillet aprés midy, et ont signé avec lesditz notaires la minutte des présentes demeurée à Mousnier l'un desditz notaires soubzsignez.

Signé : Gossuin, Mousnier.