Lettres d'un accort entre l'église de Céens et le prieur de Bretigny pour terres qui sont à Parviller.

Universis presentes litteras inspecturis frater Hugo prior de Lehuno1 Ambianensis diocesis Clugniacensis ordinis totus que conventus ejusdem loci salutem in Domino. Noverit universitas vestra quod in presentia nostra constitutus frater Matheus prior de Breteigniaco2 emit a domino Hugone decano de Parviler Ambianensis diocesis pro ducentis libris parisiensibus eidem decano plenarie solutis octo jornellos et dimidium terre arabilis moventis a monasterio beate Marie Morgnevallis que terra sita est in territorio de Parviler contigua ex parte una terre capellanie quam fundavit dominus Petrus de Parviler miles et ex altera, terre quam domicella Maria proposita de Parviler vendidit domicelle Beatrici. Quam terram emptam dictus prior de Breteigniaco et ejus successores hereditarie et imperpetuum tenebunt de abbatissa et conventu dicti monasterii de Morgneval sub annuo censu duorum denariorum parisiensium quolibet anno ad festum beati Remigii in capite octobris apud Parviler dictis abbatisse et conventui vel eorum mandato reddendorum a dicto priore de Breteigni et ejus successoribus. Ita tamen quod si dictus prior vel ejus successores essent in defectu dictorum duorum denariorum censualium ad dictum terminum, ipsi tenerentur dictis abbatisse et conventui in lege sive emenda septem solidorum et dimidii parisiensium, pro quo censu non soluto et pro lege si forte comittatur. Dicte abbatissa et conventus vel mandatum suum possunt habere recursum ad terram et saisire de fructibus ejus ad valorem dicti census et legis, et sciendum est quod quotienscunque contigerit prioratum de Breteigny devenire de uno priore ad alterum priorem, dicta terra debet relevari a dictis abbatissa et conventu de duobus solidis parisiensibus quod relevium solvet quisque prior qui succedet dicto Matheo in prioratu ante dicto prius quam gaudeat de dicta terra. Nec est tacendum quod si contingeret quod dictus prioratus alicui alie persone quam priori tradentur vel ad tempus vel ad vitam vel alio modo, quelibet persona cui traderetur dictum relevium redderet pro dicta terra antequam de illa gauderet. Has autem conventiones tam nos quam dictus prior de Breteigny de licentia nostra tenemur et promittimus firmiter tenere et inviolabiliter observare, renuntiantes quantum ad premissa omnibus privilegiis et indulgentiis apostolicis et aliis nobis et ordini nostro concessis et imposterum concedendis, beneficio restitutionis in integrum, auxilio canonici juris et civilis et omnibus aliis exceptionibus tam juris quam facti que contra hoc instrumentum et factum inveniri possent et proponi. In cujus rei testimonium, nos istam emptionem approbantes et ratam habentes presentes litteras sigillis nostris fecimus roborari.

Datum anno dominice incarnationis millesimo ducentesimo sexagesimo tertio, mense novembri.