Philippus, Dei gracia Aurelianensis episcopus, universis presentes litteras inspecturis salutem in Domino. Noverint universi quod in nostra presentia constitutus Herveus de Curia Maximini, miles, recognovit se decimam suam de Soemio dilectis filiis decano et capitulo Aurelianensibus pro sexcies viginti libris parisiensium titulo pignoris obligasse, de qua pecunie summa recognovit idem miles se habuisse plenarium pagamentum et de eadem pecunia se tenuit integre pro pagato, fide prestita promittens quod dictam decimam prefatis decano et capitulo contra omnes garantiet bona fide. Hersandis vero, mater dicti Hervei, et Amelina, uxor ejusdem, dictam obligacionem volentes et liberaliter approbantes fide prestita promiserunt quod contra eamdem obligacionem per se vel per alios in posterum non venirent. Renaudus etiam de Brutolio, de cujus feodo dicta decima primo loco movere dicitur, et Hato Cigoigniaux, de cujus feodo eadem decima secundo loco asseritur movere, milites, obligationem predictam laudaverunt et approbaverunt et fide media liberaliter concesserunt. Preterea idem Renaudus de Brutolio, miles, necnon et Aubertus de Fossatis de jamdicta decima prefatis decano et capitulo legitime garentienda per fidem astricti plegii extiterunt. In cujus rei memoriam et testimonium presentes litteras ad requisicionem parcium fieri lecimus et sigilli nostri munimine roborari. Actum anno Domini MCC tricesimo primo, mense februario.