Omnibus presentes litteras inspecturis Heinricus, miseratione divina Carnotensis episcopus, in Domino salutem. Noverint universi quod Hubertus de Pesonvilla, armiger, in nostra presentia constitutus, confessus est coram nobis se vendidisse, tradidisse et quitasse decano et capitulo Aurelianensibus pro centum et quadragenta libris parisiensium redditum cum justicia et jure que habebat ratione redditus inferius nominati super hospites dictorum decani et capituli de Villa Gauli, videlicet talem redditum : in crastino Nativitatis Domini quadraginta minas et dimidiam ordei ad minam de Villa Gauli, viginti et septem gallinas, viginti et septem oblitas, viginti et septem denarios Dunensis monete ; in crastino Resurrectionis Domini tres solidos et quatuor denarios et obolum Dunensis monete ; in die Ascensionis Domini duas partes tredecim panum et dimidii ; et de dicta pecunie summa dictus Hubertus coram nobis se tenuit integre pro pagato. Hanc autem venditionem promisit idem Hubertus se garantiturum contra omnes ad usus et consuetudines Aurelianenses, fide ab ipso Huberto in manu nostra super hoc prestita corporali, et quod nec per se nec per alium venire aliquatenus attemplabit. Vendicionem vero premissam Archembaudus miles et magister Guillelmus Abbatis, clericus, fratres dicti Huberti, voluerunt, laudaverunt coram nobis et quicquid juris habebant vel habere poterant in dictis rebus venditis per fidem suam in manu nostra prestitam supradictis decano et capitulo in perpetuum quitaverunt, promittentes per dicte fidei dationem se contra predictam venditionem et quitationem per se vel per alium decetero non venturos. Stephanus vero de Spesonvilla, armiger, qui se dicit primum dominum feodi dictarum rerum venditarum, predictam venditionem voluit, laudavit et concessit coram nobis, promittens fide prestita in manu nostra quod nec per se nec per alium venire contra aliquatenus attemptabit, volens etiam et concedens idem Stephanus quod ecclesia Aurelianensis predictas res venditas teneat, habeat et possideat in manu mortua in perpetuum libere et quiete. Verum, cum predictus Hubertus confessus fuerit coram nobis quod dicte res vendite primo loco movent de feodo dicti Stephani, secundo loco de feodo domine Beatricis de Sancto Amando, tercio loco de feodo Odonis Borrelli de Curia Alani, militis, et quarto loco de feodo nobilis viri Gaufridi vicecomitis Castriduni, promisit i lem Hubertus, per fidem suam in manu nostra prestitam, quod si quis alius dictas res vel partem dictarum rerum advocaret de feodo suo primo, secundo, tercio vel quarto loco, quod dictas res prefatis decano et capitulo in manu mortua garentiret. Promisit insuper, etc... In cujus rei testimonium et munimen presentes litteras ad requisitionem dicti Huberti et dictorum ejus fratrum et dicti Stephani qui se dicit primum dominum dicti feodi et etiam dictorum plegiorum sigilli nostri munimine fecimus roborari. Datum anno Domini millesimo CC quadragesimo quinto, mense januario.