Universis presentes litteras inspecturis frater Johannes, humilis abbas Beate Marie de Josaphat Carnotensis, totusque ejusdem loci conventus salutem in Domino. Noverint universi quod cum esset contentio inter nos et priorem nostrum de Lymoron, ex una parte, et venerabiles viros decanum et capitulum Aurelianenses, ex altera, super decima cujusdam petie culture de Lymoron, que cultura dicitur cultura deversus Villemarz, et de dicta contencione compromissum esset a partibus in venerabiles viros magistrum Galterum de Feucheroliis, Aurelianensem canonicum, et Herveum, priorem SanctiPaterni Aurelianensis, fratre Stephano Baatel, de ordine fratrum minorum, tercio cum eis nominato a partibus et electo, receptis testibus et attestationibus publicatis, tandem priore de Sancto Paterno infirmitate detento et committente aliis vices suas de consensu partium, dicti Galterus et frater Stephanus accesserunt personaliter ad Lymoron et ad terram de cujus decima contentio movebatur, qui pro bono pacis, presente Girardo, priore nostro de Lymoron et consenciente, ita ordinaverunt quod posuerunt tres metas ex transverso dicte culture, sicut protenditur versus Lymoron, videlicet duas ad duo capita et unam in medio, figentes eas in divisionem decimationis Sancte Crucis Aurelianensis, ita quod ecclesia Aurelianensis et decimatores sui habebunt, percipient et prosequentur pacifice et quiete decimam per totam dictam culturam sicut protenditur deversus Villemarz usque ad illas tres metas, et ulterius in aliis terris de Lymoron decimam non poterunt reclamare. Nos vero ordinationem eorum et positionem metarum ratam et gratam habentes, promittimus nos eam firmiter observaturos et nullatenus nos contra venire. Datum anno Domini MCC quinquagesimo, mense novembri.