Ego Herveus, Virsionensis dominus, notum fieri volo cunctis tam futuris quam presentibus quia cum Letoldus subdecanus, et Adam, prepositus pro Aurelianensi ecclesia, homines qui possessiones habehant in terra Sancte Crucis tam ex una parte Cari quam ex altera, trahere in causam aput Mazia cum in curia Sancte Crucis et ibidem justiciare vellent, et nos et homines istud contradiceremus, mediantibus domino Rainaudo de Craciaco, Gauterio Hospitalario, Mauberto, canonico Sancte Crucis, tam nos et homines quam prefati canonici tandem in hunc modum convenimus. Prefati canonici eorumque successores vel ministeriales homines quicumque possessiones habent vel habebunt ex parte Cari, in qua Maziacus situs est, aput Maziacum in curiam suam trahent, et ibidem de prefatis possessionibus eos justiciabunt. Homines autem illos qui ex altera parte Cari possessiones habebunt in terra Sancte Crucis que ex illa parte fluvii sita est, in curiam Sancte Crucis trahent et ibidem eos justiciabunt vel in eadem terra vel Castris vel aput Monestellum ; et in opcione tamen canonicorum erit quo istorum locorum justiciam suam tenere maluerint ; et in quocumque istorum locorum ipsi vel ministeriales eorum placita sua tenere voluerint, tam in duello quam in aliis justiciam suam, sicut aput Maziacum habent, integre et sine aliqua diminucione ibi habebunt. Quod si ego vel successores mei eis justiciam sicut predictum est non garantiremus, omnes, tam ex una parte Cari quam ex altera que in terra Sancte Crucis possessiones habebunt, aput Maziacum in curia sua de eisdem possessionibus justiciabunt. Verum si inter nos vel successores nostros et dominum Craciasensem guerram esse contigerit, eis quos ad justiciam suam submonebunt in eundo et redeundo bonum dabunt conductum, aut usque ad tempus pacis vel treuge different, vel ex altera parte fluvii justiciam suam tenebunt. Ut autem que supra dicta sunt nostris et nostrorum successorum temporibus firma permaneant, sigilli nostri actoritate fecimus corroborari.