Gregorius episcopus, servus servorum Dei, venerabilibus fratribus Parisiensi et Carnotensi episcopis, et Priori Sancti Martini de Campis Parisiensis, salutem et apostolicam benedictionem. Ex parte dilectorum filiorum Abbatis et Conventus Sancte Columbe Senonensis, quod ad Romanam ecclesiam, nullo, prout dicitur, pertinet mediante, fuit propositum coram nobis quod, cum felicis recordationis Honorius Papa predecessor noster, conventionem ac reformationem ipsius monasterii tibi, frater Parisiensis episcope, tunc in minori officio constituto, et bone memorie episcopo predecessori tuo, ac dilecto filio magistro I. de Montemirabili, archidiacono Parisiensi, duxerit commitendam, tu et iidem college tui, considerato statu ejusdem monasterii, pro reformatione ipsius statuistis ibidem, ut Abbas qui pro tempore fuerit coram septem monachis a Capitulo eligendis, presente quoque Majore qui, laicus existens, preest hominibus monasterii supradicti, si haberi poterit, de receptis et expensis exhibeat rationem ; alia quedam statuta fecistis, per que salus impeditur eorum, et fame derogatur non modicum, et nichilominus quies prefati monasterii perturbatur extorto ab Abbate et conventu predictis pro eis salvandis corporaliter juramento, et injuncto etiam quod nullus obediat Abbati qui de novo fuerit assumendus, donec hujusmodi prestiterit juramentum. Et quamvis potestatem vos corrigendi, et mutandi statuta hujusmodi, duxeritis reservandam si videritis forsitan expediri, dicto tamen Predecessore tuo sublato de medio, et prefato Archidiacono in remotis agente, tu, quamquam Predecessori tuo in onere successeris ac honore, solus in hoc procedere nequivisti. Quare dicti Abbas et conventus nobis humiliter supplicarunt, ut cum alia sint statuta predicta, quod facile delinquitur in eisdem, ac per hoc cavere sibi vix valeant, quin in perjurium prolabantur tam animarum periculis quam eorum infamie occurrere misericorditer dignaremur. Cum igitur juramentum non ut esset laqueus animarum, et iniquitatis vinculum, fuerit institutum, vos, frater Episcope Carnotensis, ac fili Prior, loco defuncti Parisiensis episcopi, et Archidiaconi, predictorum negotio surrogantes eidem, discretioni vestre per Apostolica scripta mandamus quatenus, si est ita, ascitis vobis viris religiosis qui in hiis que ad religionem pertinent ex longa consuetudine sint plenius informati, supradictis statuto ac juramento premissis, auctoritate nostra providere curetis prout secundum Deum saluti eorumdem abbatis et conventus ac fame et utilitati ejusdem monasterii videritis expedire, contradictores per censuram ecclesiasticam, appellatione postposita, compescendo — —

Datum Laterani septimo idus aprilis, anno quinto.