Charte de Guillaume Tirel, sire de Poiz

A tous ceus qui ces presentes lettres verront et orront, Guillaume dit Tirel, sires de Poiz, salut en Nostre Segneur.

Nos fesons a savoir a touz quemunement et ezpecialement que nos, de nostre boenne volente, en bon escient et en sain, avons ottroié au mestre, à la prieuse, as freres et as sereurs de la Meson Dieu de Ponthoise, et à leurs successeurs ou ceuz qui auront cause deus, a avoir et a tenir du tout au tout, a touz jours, heritablement, en main morte, franchement et quictement, sanz rien reclamer ne segneurie ne joutise1 ne redevance ne nulle autre chose, ne par nos, ne par nos hoirs ne par autres quiex queils soient. C'est a savoir les deus parz de toute la grosse disme de Giroucourt lesqueles deus parz Rioul de Pierrelée tenoit de nous en fie2 et en arriere fie et lesqueles deus parz de la devandite disme ledit de Pierrelée requenut par devant nous soi avoir vendu au mestre à la prieuse as freres et as sereurs de la Meson devandite et quictié sanz riens reclamer jamès par li ne par autres par nulles resons en jugement ne hors jugement. Et premetons a garentir, a tenir et a garder bien et loialment toutes les choses devandites par nostre loial creant iusque au Roy sans venir encontre par nous ne par autres en nulle maniere des ore en avant.

Ou tesmoing de laquelle chose et que ce soit ferme et estable entierement, nos Guilleaume desuz nomes avons seelees de nostre seel ces presentes lettres en bon escient et en sain. Ce fu fet et donne en l'an de l'Incarnation Nostre Segneur mil CC. sessante dis et huit ou mois de mai.