Echange de terres à Champagne entre l'Hôtel-Dieu et Robert de Tharembus.

A touz... Robert de Champaignes garde de la prevoste de Byaumont seur Oyse salut. Nous fesons a savoir a touz que pardevant nous vindrent present Robert dit de Tarembus de Champaignes et damoisele Jehanne sa fame, et reconnurent que pour leur grant profit et de leur commun assentement il ont quité et vendu a touz jours au mestre... et as sereurs de la Meson Dieu de Pontoise deus pieces de terre arable contenans trois arpens et quartier et demi, u terrouer des Ajous, desquels pieces de terre lune tient dune part a la terre Symon Baudouin et dautre part a la terre Aden Challe ; et lautre piece est tenant dune part a la terre a la dame de Sainte Genevieve et dautre part a la terre Jehan de Ambleincort lesquels pieces muevent du propre domaine aus desus diz acheteeurs pour sis deniers parisis de cens. Et tout ce... ont vendu pour vint et deus livres parisis leurs quités et pour trois arpenz de terre arable quil ont pris et receus des desusdiz acheteeurs en pris de sis livres parisis et dis sous, seans au terroir de Montengues tenant dune part au chemin si com on va de Vaus a Chambli, et dautre part aus terres Jehan de Montigni... Et ont oblige pour la vente desus dite... eus et leurs hoirs, et especiaument leur manoir de Champaignes avec toutes les appartenances et leur vigne de Longain et tout ce quil ont a Champaignes soit en terres soit en vignes soit en prés... U tesmoinz de ceste chose nous avons seelées ces presentes lettres du seel de la prevosté de Byaumont, en lan de grace mil cc. quatre vinz et diz u mois de novembre, le jour de feste Saint Andrieu lapostre.