Le maire de Pontoise enregistre une vente faite par Thomas Aupouce à Jehan de Guilley

A tous ceus qui ces presentes lettres verront et orront. Li mere et li per de la commune de Pontoise ci desous noumez salut. Nous fesons a savoir que pardevant nos vindrent Thoumas dit Au pouce et Yssabel sa fame, reconnurent en droit que de leur acort avoient vendu a Jehan dit de Guilley et a Alis sa fame, une masure et toute la cour qui est derriere... seant à Pontoise en la rue du Pont, devant la Meson Dieu, pour nuef Ib. de parisis... laquele masure est tenant a la masure qui fu Pieres le Minier dune part et a la masure qui fu Pieres Wytaut dautre part, movant ladite masure de labé de Livry a wyt parisis de chief cens et est carchiee de douze deniers parisis de cotage, et la cour muet de la Capele le Rey a deus den. par. de chief cens sans autre carche... U tesmoing de laquele chose a la requeste des parties nos avons seellé ces presentes lettres du seel de la commune de Pontoise au causes. Ce fu fet pardevant Vincent de la Ruele en ce tens mere, et pardevant ses compaignons pers, cest a savoir Jehan le Jouenne dit Draper, Simon de la Croiz et Guillaume Piletin lan de grace mil cc. iiii^xx et xv, u mois de novembre la veille de feste Saint Maclou.