Bail par l'Hôtel-Dieu d'une maison rue de la Charronnerie.

A tous ceus qui ces presentes lettres verront et orront Vincent de la Ruele en ce tens mere de la commune de Pontoyse et ses compagnons pers cidesouz nommez salut. Nous fesons assavoir que pardevant nous vindrent Gautier dit le Coutelier de Pontoyse et Marie sa fame, et reconnurent que il avoient pris du mestre, de la prieuse, des freres et des sereurs une masure seant a Pontoyse en la rue de la Charronerie tenant a la masure qui fu Guillaume le Fevre dune part et a la meson desdiz Gautier et Marie de lautre si comme elle se comporte en lonc et en lé de la dite rue jusques el marché as pourciaus, a vint et cinc souls par. de cens cotage... en tele maniere que se il estoit trouvé que ladite masure deust douze deniers de cens a liglise de Saint Maclou de Pontoyse ou as persones1 de ladite iglise ou a lun de euls que les diz Gautier et Marie sa fame seroient tenuz a ces douze deniers rendre et poier chacun an. Et doivent lesdiz Gautier et Marie en ladite masure dedanz la fin de un an acompli dis lib. parisis de amendement et se aucun deffaut i avoit de lamendement desus dit apres lan acompli lesdiz Gautier et Marie obligent pour le deffaut parfere et aemplir touz leurs biens et les biens de leurs hers... En tesmoing de laquele chose avons ces presentes lettres seelées du seel de la commune de Pontoyse as causes, presenz Gautier de Lille et Guillaume Filelin pers, lan de grace mil deus cens quatre vinz et seze el mois de juig.