Constitution de rente par Emmeline et Jehan Potin à maître Mathieu de la Mare, avocat

A touz ceus qui ces presentes lettres verront et orront Dreue le Geune garde du scel de la chastelerie de Pontoise du commandement nostre sire le Roy, salutz. Sachent touz que pardevant nous vindrent en propres personnes Emmeline la Potinne jadis femme feu Guillaume le Riche de la paroisse de Saint-Maclou de Pontoise, si come ele disoiet, et Jehan Potin son freire, clerc. Et recongnurent en droit eus avoir vendu, quitié, deloissié a perpetuité, a heritage, a touzjours mes, perdurablement, sanz rapeler, à mestre Mahieu de la Mare avocat en ce temps en la cour du vicaire de Pontoise, et a ses hers, vint souz de parisis de cens cotage a prendre et a recevoir dudit achateur ou de ceus qui aront sa cause, de ladite Emmelinne et dudit clerc son freire, chacun an mes, des ore en avant, a deus termes cest assavoir a la Saint Jehan Bauptistre dis souz par. et a Nouel dis sous par. c'est assavoir sur leur meson seant en la Charonnerye de Pontoise tenant a Berchier le Feronn d'une part et aus hers feu Robert Trotin de lautre part. Laquele mesonn fu feu Eudelinne la Potinne jadis leur meire si come ils disoient, mouvant de saint Ladre de Pontoise a nuef deniers de chier cens, chargiée en vint souz de cens cotage sans autre charge si comme ils disoient, pour le pris de dis livres de parisis, quités ausdiz vendeurs et dont ils se tindrent dudit achateur pour bien paiez pardevant nous. A tenir, a avoir et a poursuivir les vint souz de cens cotage desus diz venduz audit achateur et a ses hers bien et pesiblement des ore en avant sanz nul empeschement des diz vendeurs ne de ceus qui auront leur cause ne d'autres. Et promistrent les diz vendeurs par les foiz de leurs cors données en nostre main que james contre ceste vente ne contre la teneur de ceste lettre ne vendront ne venir ne feront en temps qui soit a venir par quel droit que ce soit, commun ou especial, ainçois guarantiront et deffendront envers touz et contre touz à leurs propres couz ec despens aus us et aus coustumes du pais. Et promistrent a paier touz couz et tous domages que ledit achateur ou ses hers aroient ou soustiendraient (sic) tant par defaute de guarantie que de avoir ledit cens rendu chascun an mes, des ores en avant... aus termes desus diz. Et à ce tenir fermement lesdiz vendeurs et chascun pour le tout en ont obligié et sousmis pardevant nous eus et leurs hers, touz leurs biens et les biens de leurs hers, meubles et non meubles presenz et a venir, ou que il soient, en nostre justice et en l'autrui, tant pour vendre et pour despendre, sanz avoir dilacion nule de toutes justices souz qui il seroient trouvez toutes les foiz que eus ou l'un de eus defaudraient (sic) de ceste lettre enterinner ou que il vendroient encontre. Et especiaument il ont obligié et pramis par leurs leaus creanz, a paier audit achateur ou a ceus qui aront sa cause, dis livres de paris se ladite mesonn estoit trouvée charchiée ne obligiée dautres charches ne dautres obligacions que desus sonnt dites et nommées. Et ont lesdiz vendeurs et chascun pour le tout renuncié et ce fet a touz privileges de Croiz prise et à prendre, a toutes exceptions, barres, defensses de droit et de fet, a toutes graces de Apostole, de Roy, de princes, données et a donner, au benefice du Velleyem et Ydriem qui est entroduit en la faveur des femmes, au droit qui dit que general renunciacion ne vaut pas, et a tout ce qui valoi et aidies leur pourroit avenir contre la teneur de ceste lettre. En tesmoing de ce nous, a la requeste des diz vendeurs, avons mis en ces presentes lettres le scel de la chastelerie desusdite, lan de grace mil deus cenz quatre vint dis et nuef le samedi apres feste de Nostre Dame en marz.