Philippe IV concède à l'Hôtel-Dieu le droit de prendre annuellement cent charretées de bois dans la forêt de Cornelle

Philippus Dei gracia Francorum Rex. Notum facimus universis presentibus et futuris quod cum magister, priorissa, fratres et sorores nostre Domus Dei Pontisara ex simplici gracia et mera nostra liberalitate consuevissent percipere et habere anno quolibet, in foresta nostra de Halata vel alibi ubi nostre placebat voluntati centum quadrigatas bosci ad ardendum, qualibet quadrigata quatuor modulos tantummodo continente, nos eisdem volentes graciam facere pleniorem, ob nostre progenitorumque nostrorum ac inclite recordationis carissime consortis nostre Johanne quondam Francie & Navarre Regine animarum remedium et salutem, volumus ac eisdem de speciali gracia perpetuo tenore presentium concedimus et donamus quod ipsi ac eorum successores ac Domus Dei predicta predictas centum quadrigatas bosci de cetero annis singulis in foresta nostra de Quernella percipiant et habeant absque impedimento quolibet, pacifice et quiete. Dantes baillivo Silvanectensi ac forestariis memorate foreste de Quernella pro tempore existentibus tenore presentium in mandatis quod prenominatos magistrum, priorissam, fratres et sorores, prenominatas censum quadrigatas bosci annis singulis de cetero habere percipere et levare in prenotata foresta de Quernella sine qualibet difficultate permittant. Quod ut firmum et stabile permaneat in futurum, presentibus litteris nostrum fecimus apponi sigillum. Datum et actum apud Pontisaram anno Domini mº cccº nono mense aprili.