Jean d'Aunay vend à Porrois 1 arpent de pre à Saint-Lambert.
- B Bibl. nat. de France, lat. 10998, nº 25.
- a Cartulaire de l'abbaye de Porrois au diocèse de Paris, plus connue sous son nom mystique Port-Royal, éd. Adolphe de Dion, Paris, 1903.
Omnibus presentes litteras inspecturis, Officialis Curie Parisiensis, salutem in Domino. Notum facimus quod in nostra presentia constitutus, Johannes de Alneto recognovit coram nobis in jure se vendidisse et in perpetuum quitavisse abbatisse et conventui de Porrois, quoddam arpentum prati quod dicebat se habere apud Sanctum Lambertum, situm in loco qui dicitur « Le Taillerz » contiguum clauso molendini de Germani Villa, in feodo Guiardi de Picta Petra, clerici ut dicebat, pro quindecim libris parisiensium jam eidem venditori solutis. Renuntians exceptioni non numerate pecunie, non tradite, Promittens, etc..... Immo dictam venditionem dictis emptoribus et eorum successoribus garantizabit, liberabit et deffendet in judicio et extra, quociens opus fuerit contra omnes. Promisit etiam, sub fide prestita, quod ipse tantum faciet et procurabit erga Mariam, matrem ipsius Johannis,Thomam, Perrotum et Eremburgim, liberos dicte Marie, quod ipsi dictam venditionem volent et acceptabunt, et de non veniendo contra, fidem dabunt. De quibus omnibus et singulis tenendis et firmiter adimplendis, predictus Johannes se et heredes suos et omnia bona sua et heredum suorum, mobilia et immobilia, presentia et futura, ubicumque sint et in quibuscumque rebus existant, eisdem abbatisse et conventui in contraplegium obligavit. Prefatus vero Guiardus de Picta Petra, clericus, coram nobis constitutus, asserens et confitens predictum arpentum prati movere ex feodo ipsius Guiardi, voluit et concessit expresse quod dicte Abbatissa et conventus et earum successores predictum arpentum prati teneant et possideant in perpetuum in manu mortua, contradictione qualibet non obstante. Promittens, fide data in manu nostra, quod, etc..... .