Carta domini Radulphi de Lacheni de XII solidis paris. percipiendis in die sancti Martini de yver et carta domini Johannis de Griviler de uno modio bladi ad mensuram de Compingne percipiendo in festo sancti Martini de yver.

A tous ceus qui ces presentes lestres verront et orront, Phelipes de Houdencourt513, chevaliers, salut en nostre Seigneur. Je faiz assavoir a tous que come messires Raous de la Chenni514 chevaliers, ait donné au couvent et a l'eglise de Saint Leu de Escerent douze sous de Paris de cens que il avoit a Houdencort, le jour de feste saint Martin en yver et messires Jehans de Griviler513, chevaliers, ait donné au couvent devant dit I mui de blé, a la mesure de Compingne, a la vallue du meilleur, quatre sous mains, a prendre en sa grange d'Houdencourt dedens la feste saint Martin en yver, si com il appert par leurs lestres, que il ont bailliées au couvent devant dict, et ladite aumosne des douze sous devant dis muesve de mes arrières fies et li muis de blé desus dit muesve de mon propre seigneurie, je, pour avoir les oroisons de l'eglise, et por l'ame de mon père et de ma mère, weilg, lo, et amorti, de tant comme a moi appartient, seulement l'aumosne que li devant dis Raous et Jehans chevaliers ont faite a l'eglise et au couvent desus dis. Ou tesmognaige de laquelle chose, j'ai baillié au couvent de l'eglise devant dite ces présentes lettres scélées de mon propre seel.

Ce fu fet en l'an de l'Incarnascion nostre Seigneur, mil et deus cens et quatre vins et quatre, ou mois d'avrilg.