Main levée et définition des usages du prieuré dans la forêt d'Halatte.

Guillaume, viconte de Meleun, conseillé et chambellan du Roy, souverain maistre et general refformateur des eauz et forests par tout son Royaume au gruier de la forest de Halate601, salut. Comme par nostre ordonnance vous aies empeschie tous les usagiers de la dicte forest de Halate et leur feist deffence que il ne joyssent de leurs usages jusques il nous soit apparu de leurs chartres et tiltres sur ce, savoir vous faisons que le Procureur du Prieur et couvent de S. Leu de Escerent par vous empeschés par la dicte cause, s'est trait devers nous par deça et nous a monstré une charte du Roy Charles Roy de France et de Navarre par laquelle il nous est apparu que les Religieulx du dit lieu de S. Leu ont droit d'avoir chacun jour en ladicte forest la charge de boys de deux asnes et qu'il les releva de certain abus que de ce avoient faict, c'est assavoir de ce que il avoient assemblé et mis les dictes charges de bois en une maison602 à eulx appartenant, en la dicte forest, et après par la rivière d'Oise la font mener en leur église de S. Leu, et leur ottroye le dit Roy par ycelle charte qu'il joyssent d'icelle usage comme ils avoient accoustumé et ainsy comme il est contenu en icelle, de la quelle nous vous envoyons un vidimuz ataché a ces présentes soubz notre signet. Si vous mandons que aux diz religieux, se deuement sans exces ou abus ont joy d'icellui usage, vous les en lessies et souffres joir en ycelle manière et selon la fourme de la dicte charte, en ostant l'empeschement que mis leur aves et lequel nous en ostons par ces présentes, saulve cause rainsonnable que y saves contraire laquelle en cellui cas, nous ferez scavoir soulz vostre scel, et enregistrer devrez vous ceste délivrance.

Donné a Paris le IIII^e jour de febvrier l'an mil ccc^o iiij^xx et quinze.