Mainerius, Dei gratia, humilis minister Sancti Florentii, et Guido, divina permissione, abbas de Sarnaio, omnibus ad quos littere iste pervenerint, in perpetuum : Sciant universi fideles quod, cum controversia diutius verteretur inter abbatiam Sancti Florentii et fratres de Sarnaio super quibusdam decimis, que in parrochia de Brueriis continebantur, tamdem consilio bonorum virorum, et precipue domini Bartholomei de Chevrose, in hanc formam facta est compositio. Pro unoquoque siquidem arpenno vinearum singulis annis persolvent predicti fratres de Sarnaio monachis sancti Desiderii de Brueriis unum costeret, continens quatuor sextaria vini et dimidium ; quod vinum non de torculari, sed ad cubam accipietur. De terris vero quas sepedicti fratres in decimatione Sancti Desiderii adquisierunt vel adquirent, et propriis laboribus vel expensis ab eisdem excolentur, habebunt monachi Sancti Desiderii pro unoquoque arpenno bladato dimidiam minam annone, mediam partem de mexteil et mediam partem avene. Sciendum vero quod hec pactio solummodo in decimationibus monachorum Sancti Desiderii tenebitur. De proprio enim feodo eorumdem a Monachis Albis nichil accipietur. Et ut hoc futuris temporibus ratum perseveret et illibatum, domini Mainerii abbatis et capituli Sancti Florentii, et Guidonis, abbatis de Sarnaio, sigillis est communitum. Actum est autem hoc in plenario capitulo Sancti Florentii, millesimo centesimo nonagesimo secundo ab incarnatione Domini anno ; presente : domino Mainerio abbate, et Aimerico priore ; Raimundo suppriore ; Michaele sacrista ; Guienocho, preposito Sancti Laurentii ; Johanne, cellarario Sancti Florencii Veteris ; Salomone elemosinario ; et fratre Gaufredo de Noerio, monacho de Sarnaio, qui cum supradicto Bartholomeo, pro capitulo de Sarnaio, huic compositioni interfuit, et multi alii.