In nomine Patris, et Filii, et Spiritus Sancti, amen. Coram nobis officiali Parisiensi, unico judice a domino papa delegato, religiosi viri abbas et conventus monasterii Vallium Sarnaii contra Almaricum Carpentarium de Ponte de Archa libellum obtulerunt in judicio in hune modum :

Dicunt et proponunt, in jure coram vobis, domine judex, abbas et conventus Vallium Sarnaii contra Almaricum Carpentarium de Ponte de Archa quod cum ipsi essent et fuissent in possessione vel quasi habendi et percipiendi, super quamdam peciam vinee quam tenet dictus Almaricus, sitam in territorio de Callouel, apud Vernonem, inter vineam Thome Touquin, ex una parte, et vineam defuncti Baudrici Ruffi, ex altera, unum modium vini albi2, quolibet , tempore vindemiarum, annui redditus, ab illis qui dictam vineam tenuerunt antequam dictus Almauricus eamdem teneret, predictus Almauricus dictum modium vini in vindemiis ultimo preteritis reddere contradixit et adhuc contradicit, sic dictos religiosos sua possessione dicti modii vini vel quasi contra justiciam spoliando ; quare petunt dicti religiosi eumdem Almaricum Carpentarium condempnari sententialiter, et condempnatum censura qua convenit compelli ad restituendam eisdem suam possessionem vel quasi dicti modii vini, et ad reddendum eisdem unum modium vini pro arreragiis unius anni quem reddere contradicit. Hec dicunt et petunt dicti religiosi, salvo sibi juris beneficio in omnibus, protestantes de probando solum quod sibi sufficiat de premissis et de expensis factis et faciendis in lite sibi loco et tempore refundendis. Datum anno Domini Mº CCº LXº secundo, die mercuris ante Brandones.

Tandem lite super premissis legitime contestata, prestito in dicta causa de calumpnia juramento, positionibus et [respo]nsionibus ad easdem factis, testibus productis diligenter examinatis, attestationibus eorum publicatis, visis actis in dicta causa habitis coram nobis ac plenius intellectis, consideratis omnibus que nos de jure movere poterant et debebant, omnibus rite peractis, die veneris post Quasimodo partibus ad audiendum diffinitivam sententiam assignata, procuratore dictorum religiosorum, ex una parte, et dicto Almarico pro se, ex altera, in jure comparentibus coram nobis, et diffinitivam sententiam a nobis ferri cum instancia petentibus, communicato bonorum consilio, per diffinitivam sententiam in scriptis condempnamus predictum Almarricum ad restituendum predictos abbatem et conventum dicti monasterii ad possessionem percipiendi unum modium vini annui redditus super vinea de qua fit mentio in libello, cum arreragiis unius anni subtractis a dicto Almarico, salvis expensis ipsorum religiosorum. Datum anno Domini Mº CCº LXº quarto, die veneris predicta.