A tous ceus qui ces présentes lettres verront et orront, Nicholas Gascoing, clerc, garde du seel de la prévosté de Vernon, salu : Sachent que par devant nous furent présenz Mahieu le Charon, de la Queue-d'Aez, et Phelippot, son fiex, et recongnurent que eus avoient vendu et otroié as hommes religieux, l'abbé et le couvent des Vaus de Sarnai, une pièce de terre, assise en la paroisse de Tylli, entre la terre Guillaume de la Fresnoie, d'une part, et la terre Helyes le Verdier, de l'autre, pour cinquante souls parisis, à tenir, à avoir et à pourseer la vente dessus dite as diz religieus et à lour successours, franchement, quitement et em pes, par douze deniers parisis de rente, rendant chascun an à la seint Remi, à Seint-Ladre de Vernon, sanz nulle réclamance desdiz vendeeurs ne de lour hoiers, par reson de héritage ne par nulle autre reson, quele que elle soit, des ore en avant estre fete, sauf le droit au chief seigneur ; einz sunt tenuz les diz vendeeurs et lour hoiers la vente desusdite as diz religieux et à lour successours contre tous garantir, deffendre et délivrer et, value à value, aillieurs, en lour propre héritage, se mestier en estoit, eschangier. Et obligièrent, etc....................

En tesmoing de ce, nous, à la requeste des parties, avon seelées ces lettres du seel de la prévosté de Vernon, sauf le droit le roy et l'autrui. Ce fu fet l'an de grace mil II^e quatre vinz et dis et sept, le mardi après la Trinité.