A touz ceuz qui ces lettres verront, Jehan Fuiret, garde du seel de la prévosté de Vernon, salut : Sachez que par devant Denis Goville, clerc juré, Nicolas Gascoing, clerc, tabellion le roy à Vernon, à qui nous ajouston foi, furent présenz Guillaume As-Chiens et Aalis, sa fame1, et recognurent que eus avoient donné, quittié et délessé, à tousjours mez, en pure eschange, à hommes relegieux, l'abbé et le couvent de Sarnay, une pièce de terre, assise en la parroisse de Tilly, entre Helyes le Verdier, d'une part, et lesdiz relegieux, d'autre, pour deus pièces de terre assises, l'une entre les moingnes de Sauxeuse, d'une part, et lesdiz relegieux, d'autre, et l'autre entre Robin du Moutier, d'une part, et Guillaume Bouvelot, d'autre, à tenir, à avoir et à pourseer par droit héritage l'eschange dessusdit as diz relegieus et à leur successeurs, franchement, quittement et em pes, sanz nulle réclamance des diz Guillaume et Aalis et de leur hers affere dès ore en avant, par reson d'éritage, de douaire, de mariage encombré ou par autre reson quele que elle soit ou puist estres, si comme eus promistrent et jurèrent, etc............

En tesmoing de laquele chose, nous, à la requeste des parties, c'est assavoir de Guillaume et Aalis, sa fame, avon seelé ces lettres du seel de la prévosté de Vernon, sauf le droit le roy et l'autri. Ce fu fet l'an de grace mil et trois cenz, le vendredi feste saint Matias, apostre.