A touz ceus qui ces présentes letres verront et orront, Guérin Vyel et Jehan Chapellain, prévoz de Chevreuse, salut : Sachent tuit que par devant nous vindrent en jugement en leurs propres personnes, Jehan de Gernonvoison, escuier, et Jehanne, sa fame, Jehannot, dit Cherruel, de Herboviller, Marguerite, sa fame, suer de ladite Jehanne, et Amelot, suer desdites Jehanne et Marguerite, filles jadis feu Phelippe de Herboviller, escuier, affermanz en droit que il avoient, tenoient et posseoient du propre héritage desdictes Jehanne, Marguerite et Amelot, un mui de grain de rente chacun an, en la maison de Crèches, de hommes religieus, l'abbé et le couvent des Vaus de Sarnay, c'est assavoir demi mui de blé et demi mui d'avoine, movant ledit mui de grain en fié de Philippe de Jehaigney, escuier, si comme il disoit, lequel mui de grain dessusdit lesdiz Jehan de Guernonvoisin et Jehanne, sa fame, Jehannot Cherruel et Marguerite, sa fame, et ladite Amelot, recognurent eus avoir vendu et en non de pure et perpétuele vente avoir otroié, quitié et délessié au devant diz religieux, pour le pris de sept vint livres de Paris, etc.................. En tesmoing de laquelle chose, nous avons seellé ces letres du seel de la prévosté de Chevreuse, l'an de grace mil trois cenz et quatre, le dimenche après la feste Nostre Dame de marz1.