Henry, par la grace de Dieu, roy de France et d'Angleterre, à tous ceulx qui ces présentes lettres verront, salut : Receue avons l'umble supplication de noz bien amez les religieux, abbé et couvent des Vaulx de Sernay, de l'ordre de Cisteaulx, ou diocèse de Paris, contenant : Comme par le traictié de la paix final fait entre feux noz très chiers seigneurs ayeul et père, lez roys de France et d'Angleterre, derrenièrement trespassez, ausquelx Dieu pardoint, et iceulx noz royaumes, tous ceulx qui lors estoient obéissans de nostre dit feu ayeul et tenans la partie de feu nostre cousin le duc de Bourgogne, derrenement trespassé, aians terres, seigneuries, rentes et possessions en nostre duchié de Normandie ou autres lieux conquestez par nostre dit feu seigneur et père, soient et doient estre restituez à iceulx ; et soit ainsi que lesdiz supplians aient tousjours demouré en l'obéissance de nostre dit feu seigneur et ayeul, et tenu le parti de feu nostre dit cousin : Savoir faisons que nous, ces choses considérées, voulans de tout nostre povoir ledit traictié estre gardé et entretenu de point en point sans fraude, ausdiz supplians, par l'advis et délibération de nostre très chier et très amé oncle Jehan, régent nostredit royaume de France, duc de Bedford, avons donné, ottroié, rendu et restitué, et par ces présentes donnons, ottroions, rendons et restituons toutes leurs terres, cens, rentes, revenus, granges, maisons, manoirs, héritages et possessions, fiefz et arrière-fiefs quelxconques, ensemble leurs appartenances et appendences, que ilz tenoient et possidoient au temps et par avant ledit traictié de paix, situez et assis lez nostre ville de Vernon, ou bailliage de Gisors, pour en joir par lesdiz supplians, par la forme et manière qu'ilz faisoient au temps et par avant ledit traictié, etc...........................

En tesmoing de ce, nous avons fait mettre nostre seel à ces présentes. Donné à Paris, le XII^me jour de juing, l'an de grace mil CCCC vint et quatre, et de nostre règne le second.

Par le roy, à la relation de monseigneur le régent de France, duc de Bedford.

1 « Milet.