I. Inst. 2.17

Quibus modis testamentum firmatur (rubr.)
[T]estament qui est fait par droit vault tant que il soit vains ou ront [1]Irritum testament est .i ruptum testament est ront quant la droicture en est abatue tant comme cellui qui fist le testament est [f. 51] en ce meisme estat ou il estoit quant il le fist quar se aucun fait son filz par adopcion par l’empereur de cellui qui estoit a soy ou par le prevost de cellui qui estoit en la puissance son pere et il fait ce puis que il a fait son testament le testament est ront aussi comme se un autre hoir feust puis nez. [2]Posteriore le premier testament que aucun fist est ront par le derrenier qui est parfait par droit ne il n’y a point de differance se aucun en estoit hoir ou non quar l’en ne regarde fors sans plus se il pouoit valoir par aucun cas et pource se aucun ne veult estre hoir ou il meurt ains que cellui qui fist le testament ou depuis avant que il ait receu l’eritage ou avant que la condicion soit acomplie soubz quoy il fust fait hoir le preudon meurt en ce cas sans testament quar le premier testament ne vault rien qui est ront par le derrenier et le derrenier n’a nulle force pource que nul n’en est hoir. [3]Sed si quis Mais se aucun a premierement parfait son testament par droit ja soit ce que il ait en cestuy establi hoir de certaines choses le saint empereur senous et antonius escriprent que le premier testament fault et nous commandasmes que les paroles de leur establissement feussent mis en nostre livre pource que elles touchent encores autre chose les empereurs senous et antonius dient que le testament qui fu fait au derrenier vault par droit ja soit ce que hoir y fu establiz de certaines choses et que mencion n’y est pas faicte de toutes les choses de l’eritage mais celluy [f. 51v] qui y est fait hoir est tenuz de soy tenir a paié des choses qui lui ont esté donnees ou que il retiengne la quarte part de tout l’eritage et rende le demourant a ceulx qui furent faiz hoirs ou premier testament / Parquoy il est dit expressement que il ne conviengne pas doubter que le premier testament ne vaille et en ceste maniere est testament ront. [4]Alie autem le testament qui est fait par droit est quassez en une autre maniere quant cellui qui fist le testament fait a son serf amenuisement de chief et nous avons dit ou premier livre comment ce advient. [5] l’en dit en ce cas que les testamens sont vains quant ilz sont ronx et ceulx qui ne sont pas faiz par droit sont vains dés le commancement Et ceulx qui sont faiz par droit et puis sont faiz vains par amenuisement de chief pouons nous dire qu’ilz sont ronx mais il feust plus grant proufit que toutes les causes feussent distintees Et pource dit l’en que les uns sont faiz par droit mais ilz sont ronx ou ilz sont vains. [6]Non tamen ne pourquant les testamens qui furent faiz par droit au commancement et puis sont faiz vains par amenuisement de chief ne sont pas du tout sans proufit quar se ilz sont seellez des seaulx a vii. tesmoings cellui qui fu fait hoir pouoit recevoir la possession des biens selon les tables du testament se cellui qui fist le testament estoit citoien de Romme et il n’estoit pas en autruy puissance quant il fu mort quar se le testament est vain pource que cellui qui le fist est perdu de la cité de Romme ou franchise ou que il se donna a estre filz adoptifs a aucun et que il estoit en la puissance de son pere adoptif quant il fu mort cellui qui fu fait hoir ou testament ne pouoit pas [f. 52] demander la possession de ses biens selon les testables du testament. [7]Ex eo autem. Testament ne peut pas estre cassez pource sans plus que cellui qui le fit ne voult pas que telle euvre feust aprinse que ycellui testament vaulsist quar se aucun a fait son testament par droit et il commence aprés a faire un autre et la mort le devancist ou il se repent si que il ne le parfait pas / l’empereur pertinent establist que le premier testament ne soit pas pource vains quar testament qui n’est pas fait n’est nul [8] par celle meisme raison dit il qu’il ne recevra pas l’eritage a cellui son hoir pour cause de plait et que il prouverra que les tables ne furent pas faittes loyaument / en quoy il estoit establi hoir pour celle cause et que il ne recevra pas nom d’oir pour une voix et que il ne conquerra nulle chose par escripture a qui l’auctorité de droit faille / et selon ce escriprent souvent les sains empereurs / senons et antonius ja soit ce sont ilz que nous soions au dessus des loys ne pourquant nous ne voulons rien faire qui soit contraire aux lois

II. Inst. 4.17

De officio judicis (rubr.)
[I]l convient que nous traictons de l’office au juge et le juge doit regarder premier que il ne juge fors sicomme il establist par les lois ou par les establissemens ou par les coustumes [1] et pour ce se l’en plaide contre le seigneur[f. 138] pour le meffait a son serf se le seigneur doit estre condempné le juge doit garder que il le condempne en ceste maniere je condempne mene a tice que il lui part dix deniers d’or ou que il lui abandonne son serf a souffrir la peine pour le meffait [2] et se l’en plaidie pour aucune chose se il donne sentence contre le demandeur il doit absouldre celui qui la poursuit et se il donne sentence contre cellui qui poursuit il doit commander qui il rende la chose et les fruiz / Et se cellui qui poursuit nie que il ne peut orendroit rendre et l’en voit que il ne le fait pas par barat terme lui soit donné de le rendre / mais il donne pleiges de rendre au terme la chose ou la valeur / Et si hereditas Et se heritage est demandé ce meisme soit gardé des fruiz que nous avons dit en la demande d’autres choses et il doit rendre raison d’iceulx fruiz que il n’a pas retenu par ses coulpes se il poursivoit la chose par male foy / mais se il la poursivoit par bonne foy / il ne rendra pas raison des fruiz qui sont despenduz et il couvient rendre ceulx qui par la coulpe de cellui qui poursuit la chose n’en sont pas receuz aprés ce que le plait fu entamé / et de ceulx qui furent receuz qui sont despenduz [3]Si ad exibandum Se l’en plaide pour faire venir avant une chose / il ne souffist pas que cellui a qui l’en plaide l’aporte avant ains convient que il monstre la cause de la chose / c’est que le demandeur ait ceste meisme cause que il eust se la chose eust esté apportee avant dés ce que l’en commança a plaidier se il la dont tant tenue dedens ce que il appart que il l’ait gaingnee par longue tenue pour ce [f. 138v] ne remaint pas que il ne soit condempné et par ainsi le juge doit faire rendre les fruiz qui ont esté cueilliz de la chose puis que le plait en feust meuz jusques a tant que sentence en soit donnee se cellui a qui l’en plaide dit que il ne pouoit pas maintenant monstrer la chose et il demande terme et il ne le fait pas par barat le terme lui doit estre donné par pleiges / et se il ne aporte avant la chose ne il ne veult pas donner pleiges d’aporter l’un au terme il doit estre condempné en tant comme le demandeur eust de preu se les choses eussent esté apportees avant dés le commancement. [4]Si familie hoir asconde¹ se l’en plaidie par jugement de departir heritage le juge doit jugier a chascun des hoirs sa partie et se il lui semble que il greve l’un d’eulx le juge le doit condempner en certaine quantité de deniers Eo quoque nomine Aucun doit estre contempné a cellui qui est compaignon de l’eritage pource que lui seul a receuz les fruiz de tout l’eritage ou pource que il corrompi aucunes des choses de l’eritage et ce doit estre gardé quant il y a plus de deux hoirs. [5]Eadem intersunt Aussi est il se l’en plaidie pour pluseurs choses par jugement de departir choses communes et se ce est d’une meisme chose sicome d’un champ se elle peut estre partie l’en doit jugier a chascun sa part et se la partie a l’un vault mieulx que celle a l’autre il lui doit faire rendre deniers et se la chose ne peut estre partie sicomme se l’en plaidie pour un serf ou pour un cheval elle doit estre toute adjugee a un et il doit estre condempné a l’autre en certaine quantité de deniers [6] se l’en plaide pour bonner terres [f. 139] le juge doit regarder se il est mestier de faire en jugement et se il en est mestier en un cas C’est assavoir se il les convient deviser par plus anciennes bonnes que ilz ne furent jadix quar lors convient que aucune partie du champ a l’un soit adjugee a l’autre Et en ce cas convient il que cellui soit condempné a l’autre en certaine quantité de deniers. Eo quoque nomine Et aucun doit estre condempné par ce jugement se il a aucune chose malicieusement envers les bonnes sicomme se il a emblees les pierres qui estoient es bonnes ou il a arrachié les arbres Contumacie Et pour convenance doit estre chascun condempné par ce jugement sicomme se aucun ne seuffre pas que les champs soient mesurez quant le juge la commande. [7]Quod autem Ce qui est adjugié a aucun par ces jugemens est maintenant a cellui a qui il est adjugié

I. Auth. 34 (Nov. 105)

Cist tytres est des conselliers (rubr.)
[praef.]Li empereres iustinians dit a stratice. mestre des sainz dons. Li nons et la cause de la dignité au conseilliers fu trovee encianement a rome contre le profit as anemis. sicomme il estoient ordené par commun assentement. il estoient sodement envoié es contrees. en coi li romain avoient batailles. et parure gaaignoient il les aneurs. mes li empereor qui furent aprés orent la poosté de fere pés ou guerre. et en leur tens fu il establi : que li conseillier ne feissent por recevoir ce que l’en leur vousist donner atrempeement et ordeneement. et sanz passer mesure. et la cause est venue petit et petit. a si granz despensses. que aucuns d’eus mestront leur covoitise. et ne se porpensent pas que il n’ont nule autre essemple. car plenté de chatel ne vient pas au plusors qui ne vient pas de la quantité des choses. mes de ce que li corages s’en tient a paié. et por ce que nos veons que li nons des conseilliers. est em perill de faillir. qui crut o l’empire de rome ; il a prés de mil anz. nos est il avis que il convient conprandre la cause et oster en la desmesure. et establir renablement les despenses ; au conseillers ; [f. 51c] si que cele dignité durt toz jorz a rome. et que cil la recevent volentiers. que nos jugerons qui en seront digne. quant nos eusmes donc tout encerchié nos regardasmes combien i leur convient donner. une loi fu donc escrite par marcian qui fu uns des granz empereeurs. qui voloit que li conseillier. ne gatassent pas les deniers. et ce fu li primiers de ses establissemenz. Nos trovasmes donc aprés le devant dit establissement. que cil qui le sivirent ne soufrirent que li consellier donnassent rien au pueple. li autre requistrent que il pouissent plus fere que la loi ne commandoit . et empetrerent ce que il requistrent. et puis regarderent a la covoitise de leur corage. et vostrent avoir plus que ce qui avoit esté establi. et li autre eslurent par droit le maain. et lessierent pluseurs choses por user en ; et s’en tiendrent a paiez. car il sembla a ceus qui furent devant nos que ce qui est maiain est tres buen. et por ce vosismes nos establir ce qui est avenant chose. que rien ne soit trop grant ne desordené. ne contrere a la dignité de noz tens. [1] Nos avons donc commandé que il soit escrit en nostre loi/ combien il convient donner a despondre au conseillier que nos eslisons chascun an ; E nos metons ce en loi que avenant painne soit enjointe. a celui qui le trespassera. et nos ne volons pas que leur rantes soient amenuisiees. ¶ Nos avons donc ce escrit et determiné des desponsses. as conseilliers. [2]et se li conseilliers a fame nos avons juigiees. les despenses que ele doit avoir. car il est avenant chose que les fames partent a la hautece leur mariz. et se il n’a fame il seus avra cele aneur : se il n’a mere qui en soit digne. et qui ait avent esté ennoree. que il vuille qui use o lui de cele [f. 51d] enor. et celi otroions nos en sa mere premierement tant seulement car nule autre n’en sera onoree que sa mere ou sa fame mes celes en soient onorees en toutes manieres. car les fames partent a la hautece leur mariz. por la loi qui ce leur otroie . et les meres partent a la hautiece leur filz. se li fill veilent. car sa fille n’i part pas ne sa suer. ne la fame son fill. et meesmement se ele ne li apartient de rien / car ce est purement contre droit. ¶ [2.1] Li establissemenz a l’empereor marcian. desfendi donc que li conseillier ne donnassent rien au pueple. mes nos amandons cele cause. et l’ordenons par la volenté a celui qui a l’aneur de conseillier. se il ne veut rien donc donner : nos ne l’en contraignons pas. et se il veut donner al pueple de son argent. nos ne li defendons pas. Neporquant nos ne soffrons pas que il departe or de quel forme ne de quel pois que il soit. mes argent si comme nos avons dit avant ; car de tent comme li don seront amenuisié. de tant i. avra il plus d’espargneeurs. et la mesure de la chose soit selonc la vertu. et selonc la volenté a celui qui donne. ce avons nos jugié en la dignité de conseillier : ne ne contraignons pas ceus qui ne vuelent donner. ne ne desfendons pas a ceus qui veilent donner que il ne doignent. mes nos avons issi establi de departir leur argent. et se il vient a ce il ait congié de departir son argent sicomme il quidera que il soit bien. et celi soit defendus sanz plus que il ne departe or. que nus ne doit avoir fors li empereres. [2.2]et nos n’otroions en nule maniere que nule des autres choses que nos avons jugiees et escrites en ceste loi. soient trespassees ne acreues ne apeticiees. et nos metons le donner en la volenté. a celui qui donne et en sa poosté. ces[f. 52a]te nostre loi defent dont que nos avons une foiz. jugié et ordené ne soit pas trespassé. et se aucuns emprent a trespasser le il paiera painne de c. lb. d’or porce que ill a trespassé noz commandemenz . et a corrompu en tant comme il est en lui toute l’intention de ceste loi a esté fete por ceste achoison tant seulement que les dignitez as conseilliers. ne faillent por les desmesurez dons et porce avons nos abregié les outragex dons. et les despensses. si que il soient toz jorz en point. et a noz tient nostre empire de leur non. cil qui trespassera : ce qui est ordené. sera dignes. de soffrir painne comme brisierres de la loi ; Eissi avrons nos pardurablement conseilliers qui ne douteront pas les dons desmesurez. ne n’esmineront pas la digneté des conseilliers . comme certains perill. et porce establissons nos que ceste loi soit gardee fermement. [2.3] Nus n’empraigne donc a passer la qui que il soit ou juges ou curiax ou baillis. et porce que nos avons regardé cez choses. nos avons nus oelté en tot les dons. et ne donnons a nul congié de trespasser. la mesure. qui est contenue en ceste loi. et nos avons toz mis en la volenté as conseilliers. si comme il a esté dit sovant. et cil qui avoient acotumé a recevoir les dons nos doivent randre tresgrant graces por ceste loi. car se il fussent em perill que il ne receussent rien quant li conseillier fussent failli et il recevent ore atramprez dons. il doivent randre graces a ceste loi. de ce que il recevent par lui. et de ce que ele n’octroie pas as conseilliers. que il doignent leur or ne lor vesiaus. et nos avons trové cest establissement por humanité qui donne medecine au pueple. Car cil qui i ont la dignité de conseillier font ce. et il s’acordent au pueple. sanz plus. il n’estriveront pas de gregnors guaainz. ne ne contenderont enssemble. [f. 52b] ne ne feront mellés o bastons ne o glaives ne o pierres car ce est une chose que nos haons moult ; car nos solions veoir que trop de maus avenoient. par l’achoison des choses que il donnoient. et de celes qui lor estoient tolues. si que il n’aportoient rien en leur mesons. ainz despendoient chacun jor en trop boivre et en trop mangier. quanque il avoient. et se il avenist par aventure que il eussent esperence de plus gaengnier. et il despendissent aucune chose ainz que il eussent. et il receussent aprés ou niant ou mains que il ne quidoient. il eussent damage : et chaïssent en dete. Nos avons donc amené par ceste loi commune. si que la remanbrance de conseillier soit aprés nostre tens. et as juges. et as curiaux. porce que il nos plest a enorer cex qui en sont digne. qui ne despendent pas a desmesure. et nos donnons de ce avenant confort . et a nostre pueple et a toz autres. et otons l’outrage por fere que la dignité de conseillier soi soit pardurable en nostre chose commune. [2.4] Nostre ordenement soit donc sozmis a ceste loi sicomme nos avons dit avant. de qoi li essemplere soient repost en la cort de ta hautece. o ceste loi. et nos establissons que li conseillier qui seront selonc le tens praignent l’essemplere de ceste descripcion en ta cort tent seulement. si que selonc ce leur soient donnees toutes choses. car nos volons que la descripcion soit donnee de ton siege que il ne leur lise pas a changier la. ne a ceus qui sont apelé abreviateur. ne a muer aucunes des choses que nos avons establies. mes li essempleres de ceste descripcion soit donnez de ta cort au perill a ceus qui le gardent. o la subcripcion a celui qui a ta dignité que tu as orendroit si que les choses que nos avons ordenees soient gardees sanz muer. et nus de ceus qui sont [f. 52c] apelé a l’aneur de conseillier ne sera grevez se il fet renables despenses. Quer nos dorrons a ceus qui avront l’aneur de conseillier . quanque il soloient oir jusque ci et de la cort de ta hautece. et de noz prevoz . et d’ailleurs. et issi apetiçons nos les despenses. que il leur convient fere. et n’apetiçons pas les dons que nos leur solons donner. la fortune l’empereeur soit donc receue en toutes cez choses que nos avons dites a qui diex a sozmises les lois. que la dignité de conseillier soit en notre empire. en toutes les citez et en toz les pueples. et en toutes les genz. et cil ait cele dignité que li empereres en voudra enorer. [epil.] Ta hautece receve donc ceste notre loi. et s’entremete que ele durt pardurablement en sa force selonc toute la vertu qui i est contenue. la forme de ceste loi a esté escrite a jehan prevost d’oriant. et a longin prevost de ceste beneuree cité.

II. Auth. 58 (Nov. 49)

Cist tytres est de ceus qui porsuient leur apel et que comparoison ne doit estre fete fors des communs instrumenz et de serement qui est fez por delaiement qui est joinz a serement de verité (rubr.)
Li empereres justinians dit a jehan le prevost. [praef.] Nostre humanité est movable. et ne puet demorer en .i. estat. et ce est une chose qui amaine grant paine a ceus qui font les lois.et l’en juge ce que l’en quide qui soit droiz. et establiz fermement. mes la diversité des causes qui nessent. trouble sovant les choses qui sont establies par grant soutileté. Nos savons bien que nos avons pieça amandé. ce qui estoit fet mallement et tricherressement es apiaus. car cil qui apeloient ne fesoient fors mener la cause a autre jugement. et puis la lessoient si que li vainquierres ne pooit pas desploier s’autorité. ne ne pooit user por l’apel des choses qui estoient jugiees. ne li apiaux ne pooit estre examinez. porce que li apelerres se defailloit. [praef.1]et nos amendasmes pieça ce. et donnasmes a l’apeleeur [f. 61a] terme d’un an a porsivre le plet. et a recevoir son droit. et par desus ce se il covenoit que li apiaus fust alongniez. par achoison d’un juge. ou par aucune autre cause qui ne peust estre eschivee. Nos i donnasmes. i. autre en determe. et se li plez est acompliz dedanz ce. nos jujasmes que la sentence qui fu donnee. soit tenable. cez choses nos ploient donc. et furent escrites en une commune loi. et volons que ele soit tenue. [praef.2] Mes pluseur nos ont requis qui ont dit. que il avoient apelé et voloient que la cause fust examinee mes il ne le porent empirer vers le juge. porce que il estoit par aventure enbesongniez de chose. que il ne peust eschiver. et li autre se sont escusé par le vent qui ont dit que il ne pooient venir de leur contrees. par mer por la force del vent. ne il n’i pooient venir par terre por leur povreté. ou por ce par avanture que leur meson estoit en une ille. si que il n’i pooient venir fors par mer. et por ce ne porent il pas examiner la cause jusqu’a fin dedanz le segont an. et li un le lessierent por force de tempeste et li autre por maladie. si comme nos avons oï par ceuls. qui en sont venu a nos. et cez choses nos vinrent par droit. et nos ne vosismes pas trespasser la loi. et nos vosismes mestre pooir donner aide a ceus qui dont grevé par tele aventure et covenoit il donc fere fors regarder a une autre loi. qui aidast par droit a la cause. [1] la forme de la devant dite loi soit donc gardee en toutes tiex choses. si comme nos avons dit. et se aucune chose avient por verité qu’il ne puisse estre eschivee et cil qui porsuit la cause d’apel ne la garde pas. et li dui an sont acompli. la sentence qui fu donnee soit lors confermee sicomme nostre autre loi dit. mes ce soit par une division que nos i ajostons orendroit. [f. 61b] car nos trovons que li vainqueeur faingnent lonctens a ceus qui porsivent l’apel. et neporquant il ne vuelent pas plus soutenir l’examinement de la cause. ou il la lessent el mileu. et porce amenuissons nos .i. pou ceus por que la sentence a esté dounee et avons regardé une chose qui est bien avenant. car nos volons que se cil por qui la sentence a esté donnee veut que ele soit confermee. ce ne soit pas fet por decevance. ne por aucun tens. mes por la verité des choses. quant cil qui apela sera presenz . et se li apelerres lesse son apel. ses aversaires le doit querre. et se il ne li puet trover. ou se cil ne vient pas avant. lors mete il avant les allegacions. vers la fin des .ii. anz. si que il i ait encore avenir. al mains .i. mois. et se il apert que il ait la meillor cause. lor soit sa sentence confermee . et se il a la poieur. et cil qui apela vient avant. la cause soit menee par droit. et ce il soit ajosté. que se cil por qui la sentence fu premierement donnee vaint la cause. ou il en est vaincuz. cil qui se defailli li pait. toutes les depensses. que il a fetes el plet. puis que li apiaus fu fez. car se il guaaigne la cause. il est droiz que les depensses li soient randues. et se il est vaincuz si li doivent eles estre paiees! porce que ses aversaires se defailli. et li apelerres rande grasees a dieu. et a ceste loi qui eissi li garde son droit. que il n’i a damages fors des despensses que la loi ne li tost pas. mes il meismes qui le defaut. et se li uns ne li autres ne vient avant. ne cil por qui la sentence fu donnee. ne cil qui apela encontre. la sentence soit tenable. et toutes les autres choses qui sont escrites es lois des apiaus. soient tenables. et es espaces des tens. et es autres choses. Nos fesons ceste loi especialment. por cex qui lessent leur apiaus puis que il les ont commenciez[f. 61c] a porsivre. n’en abatons ne ne chaions rien des autres lois des termes des apiax. [1.1]et il est buenne chose que nos determinons des apiaus et il est buenne chose que nos determinons que se il avient que aucuns ait receu sentence. qui esclere fermement sa inchoite. et il en puisse user. car nos ne movons rien des choses. qui ja sont determinees. mes se la sentence est encore en crole. et li dui an ne sont pas encore passé. Ne ele n’est pas encorre afermee. il convient que ele soit examinee. et que li vainquierres en use se il mostre que ele ait esté donnee par droit. ¶ [2] Il nos semble que il convient ajoster a ceste loi. que porce que nos escrisimes pieça une loi. qui voloit que nus ne feist comparoison. par l’escriture de sa propre main. mes par instrumenz tent seulement qui fusent fet communement et nos voions que les causes aient besoig que cest loi soit amenee avenantment . et ce savons nos par ceus meismes qui pledent et porce le volons nos amander. car il avenoit sovant que aucuns aportoit avant l’instrument. qui avoit esté escriz d’une main por trere en cause son aversaire. ou por prover ses allegacions. et l’autre partie aportoit avant unes letres. qui avoient esté escrites de cele meisme main. et li premiers voloit que comparoison fust fete de cez deus instrumenz. et li autre usoit de cele loi. et disoit que comparoison ne doit estre fete que des instrumenz. qui sont fet commuenement . et venue de ceus que aucuns autres escrit. [2.1] Nos establissons donc que aucune tel chose avient aucune foiz. et aucuns veut que la cause soit examinee. selonc les letres que ses aversaires a porté avant. li aversaires ne les puisse pas acuser. autresi comme se ele ne fus[f. 61d]sent pas a droit fetes. car dés que il les croit. et il les aporte avant por afermerz ses aulegacions. il ne les puet pas acuser ne defendre. que comparoison n’en soit fetes a autres letres. ja soit ce que eles soient escrites par autre main que par commune. car nus ne doit contrester a lui meisme. ne acuser ce que il a afermé. [2.2]et se une chartre est aporté avant. des communes almeres. si comme nos savons que il avient. aucune foiz. l’en demande se ce qui vient aissi de commun lieu et a commun testemoine. doit estre receu a fere comparoison des mains. Nos haons par tout le crime de fauseté et avons establi que cil qui aportent avant tiex letres. facent serement que eles sont leaus. et avons otroié que comparoison soit fete par les communs instrumenz tant seulement et porce cele loi vaille en toutes choses. mes ceste subdivision il soit ajostee. mes li serement soit pris en toutes manieres de cex ui feront la comparoison. ¶ [3] E porce que nos vosismes por la reverance des pledeeurs. que les deus parties feissent serement au commancement del plet. et li demanderres i jurast que il ne muet pas le plet por grever autrui a tort son aversaire. et li defenderres jurast que il croit que il a droit de defendre soi. Nos feismes de ce une loi commune a toutes persones que nule n’en soit escexptee. et nos i ajostons que se aucuns demande prueve ja soit ce que ce soit de ses sers. ou de ses letres il jurt avant que il ne le fet pas por cause de delaiement. car pluseur sont qui sanz plus por tort fere. et meesmement contre les nobles fames quant l’en offre proeve contre frans il queurent a cest serement. si que serementz est sovant demandez en une cause. [3.1] Nos ostons donc cest confort et ne volons pas que serement soit sovant [f. 62a] fet en une meisme cause. et establissons que se l’une et l’autre partie a fet serement. et li demanderres a juré que il ne muet pas le plet a tort por traveillier son aversaire et li defenderres a juré que il croit avoit droite cause. chascuns die que il ne demandera ja puis a son aversaire. serement por cause de delaiement. ja soit ce que il conviengne sovant ameener prueves d’une part et d’autre et nule des parties ne soit contrainte de fere sovant serement. quant cil general seremenz avra issi esté fez. [epil.] Ta hautece face donc savoir a toz. par solemnes banissemenz les choses qui nos plesent. et qui sont escleriees par ceste sainte loi. que tuit sachent ce qu’il nos plest.

III. Auth. 81 (Nov. 80)

Cist tytres est del qesteur (rubr.)
Li empereres justinians dit a jehan le prevost. [praef.] Nos nos porvoions del tout o l’aide de damediex. que li sozmis que damediex nos a bailliez soient gardé d’estre grevé. Nos fesons donc lois por maintenir jostice. et por raparé ce qui s’escolore petit et petit. E par desus ce trovons nos aucuns baillies. qui chastient ce qui est fet desanoreement. et font maains mesfez. sicomme il avient que li prevoz del pueple. font aucune chose en ceste grant cité. que cil qui abitent ceste real cité loent par l’experiment des choses. Il nos semble donc que il est droiz que nos [f. 75c] truissions par cest experiment une autre chose qui a mestier d’aide. car nos avons trovees que les contrees sont despoilliees petit et petit de leur abiteeurs. et ceste cité est pueplee de grant plenté de divers homes. et meesmement des coutiveeurs de chans. qui ont lessié leur citez. et leur chans [1]et cez choses nos ont mené a fere ceste presente loi. et a une dignité qui est pres que novele. a qui nos volons bien donner annonnes del commun qui li soffisent. et nos metons a ceste dignité et a cestlui qui la receit non de questeur. car aissi apeloient li encian ceus. qui venoient a cel office. [1.1]et nos volons que cil qui ont esté digne. regardent a dieu. et a la crieme de nos. et a la loi. et quierent par ceste grant cité les homes et les fames de qel contree que il soient. ou les clers ou les moinnes ou les nonnains. ou les avocaz d’estranges contrees. ou autres de qel fortune et de quel dignité que il soient . et encerchent qui chascuns est. et dont il est venue et par quele achoison et se cest est coutiveeurs li questeurs regart asquiex de noz juges li plez apartient d’els. et les delivre justement del besoig por que il sont ça venu. et les renvoit la dont il vindrent. [2]et se il i a aucuns costiveeurs qui aient segneurs et il sont ça venu por aucun besoig. li questeurs oie maintenant les causes. por que il sont venu et les en renvoient o ce qui sera droit. et se il sont venu par avanture contre ceus qui les porsieent. et il ont cause contre eus. se il en i a plenté li questeurs en renvoit les pluseurs. et il en i remaingne deus ou trois. et aissi s’entremete il d’oïr le plet. et determiner le maintenent si que il ne demeurent pas lonc tens hors del païs. et meesmement li coutiveeur qui n’ont que fere en ceste cité. et leur oiseuse feroit damage et a els [f. 75d]et a ceus qui les porsieent. [3]et se il n’i a pas plenté de coutiveeurs. mes li un il viennent par avanture por pledier contre les autres. et il demeurent ci. il n’i sejornent pas. mes li juge les facent venir avant moult vitement. et les delivrent del plet. et puis les renvoient en leur contrees . et se cil qe nos avons establi met autre a oïr le plet. as coutiveeurs des chans. et cil porlongnent la chose. et il ne la terminent pas inelement. Cil que nos avons mis en ceste dignité face venir les parties par davant lui. o cels qui par aucun droit vuelent estre delivre de ceus qui les porsieent de qui la cause ne peut pas estre vistemement examinee. por qoi il demeurent en ceste grant cité. si les renvoit en leur païs ou es lieus dont il sont venu. si que nul priviliege. ne nule excepcion de cort avenant ne vaille contre ce. [4]et se aucuns sont en ceste nostre cité por l’achoison de leur vie qui n’i ont nul plet a fer por avoir leur vivre. ou porce que il n’ont pas ailleurs qui leur soffise. li questeurs regart leur estat. et quiex chascuns est et se il sont fort ou puissent de soffrir travaill. se il sont serf il enquiere qui il sont et les renvoit a leur segneurs malgré leur. et se il sont franc ou né d’aucunes citez. ou d’aucunes contrees. il les renvoit as lieus dont il furent né. [5]et se il sont de ceste terre. et il sont fort de leur cors. et il n’ont pas de qoi vivre soi. il ne convient pas que il entrelessent por neant l’ovraingne de terre. ainz soient baillié au communes huevres. et serven [sic] ou as bolengiers. ou a ceus qui font les cortilz. ou a autres divers mestiers que il puissent fere. si que il chargent leur vie pereceuse en melleur. [5.1]et se aucun veilent servir as huevres a que il sont baillié. il les sivent en ceste real cité. et nos establissons ce que perece nes [f. 76a] face torner a malveses uuevres que il ne leur coviegne soffrir painne par les lois. et estre baillié a noz juges. et nos comendons que cil ou celes qui sont fuebles ou par maladie ou par viellece. soient tout en pés en ceste buene cité. et soient ajoint a ceus qui veilent bien vivre. et l’en demant a chascun des autres por quel cause il est venuz a ceste cité. et quant il avra tout enquis il face de chacun ce que droiz sera que il ne soient pas ci oiseus. ainz facent ce que il devront. et reviegnent a leur propres contrees. [6]et se aucuns de ceus qui vienent a ceste cité. ou de ceus qui i habitent se plaingnent d’aucun de noz bailliz. porce que il leur ont fet damage ou grevé les en aucune maniere. et il dient que il ont trestornee noz lois. ou que il les ont semons sanz le commandemant au juges. li questeurs enquiere soutilment ceus qui font cez mesfez. de quel dignité il sont. et de quel chevalerie . et sor quel dignité. et puis les praingne . et quant il avra enquise la verité il leur enjoigne les painnes qui sont establies es lois. si que nus juges ne les en puisse defendre. et que cil a qui li torz a esté fez soit gardé de grief. ainz aient arrierre ce qui leur a esté tolu contre la loi. et les painnes qui sont jugiees en noz establissemenz soient enjointes aus baillis. qui ont fet tel chose. [7] E par desus ce li qesteurs enquiere la verité. quant aucuns plez est meus de fausenerie. ou de fausse escriture en aucune assemblee. et praingne celui que l’en li denoncera! qui est corpables de cel crime. et le punisse quant il sera provez. car nos l’en donnons le pooir. et se aucuns de ceus qui sont grevé en tel maniere. ou que juges soit ordenez selonc ceste presente loi. et il voit que il n’ait pas droite porveance. si que il est contrainz[f. 76b] d’aporter sa plainte a nos et a l’empire! cil qui prant ceste dignité sache apertement que il rendra a celui qui a esté grevé ce que il a perdu par sa negligence. et par ce que il n’a pas mis entente a vanchier le de ses malfeteurs. et par desus ce il sentira nostre endaingnement. comme cil qui a empris a trespasser nostre commandement . et meesmement cil qui ont ceste baillie. [8]et il doit torjorz metre entente que il face onetesmains. qanque il fera. et que il ait ministres qui ne soient pas looeiz. ainz aministrent purement et franchement. et se il trueve aucun mesfez en ses ministres il les punisse. et mostre premierement par che sa fermeté et sa chastee. car por ce li avons nos establi. x. lb. d’or. por ses despensses. et a son conseillier. v. et a ses ministres .ccc. et .xxx. s. chascun an . et avons commandé que ce soit escrit en ceste loi. si que il se tienggnent a paier de ce que il ont de la borse l’empereeur. et s’atiegnent d’autrui choses. et issi seront il soutill coutiveeur de dieu et de nos. et avront del ciel et de nostre porveance ceste aministracion. et useront des causes plus legierement et plus lealment. [9]et nos donnos [sic] a celui qui a ceste baillie fiance d’anquerre les fez au juges. et de raporter les a nos. et de fere d’eus meismes ce que droiz sera. si que nule fueblece ne nule autre chose ne li toille. que il ne soit par desus toz autres par nostre jugement autresi li donnons nos congié d’avoier communes espitres as prevoz des contrees . que il envoient en leur contrees ceus que il les i facent estre sanz plet. et il leur commant que il or aident se mestiers en est. et il doit porveoir par devant les autres choses. que il ne soit pas molestez de rechief. par ceus qui demeurent ci porveant. que il en a envoiez une foiz en leur contrees. [f. 76c]et puis li donnerent achoison de seconde causes. Mes se il trueve autrefoiz en ceste beneuree cité aucuns qui il sejornent por niant que il a delivrez et avoiez en leur propre contree. il les chastit avenentment . et les en envoit de rechief. aissi habiteront il hors des citez. et ceste cité sera delivree de confusion . et se il veut metre outremer aucuns de ses officiaux. qui enquierent eus qui vendront dehors. et recevent ceus qui leur seront envoiez de ci. et les envoient a leur contrees. il puisse ce fere. et enqerre en toutes choses le preu de la chose commune. [10] Nos establisons toutes cez choses porce que nos avons grant cure de noz sormis que il ne lessent pas leur contrees . et soient ci a mesese. et muirent. et perdent leur propres choses. et ne soient pas en foi o leur peres. et cil qui establirent la chose commune . et firent premierement les lois orent ceste estuide. Mes la chose ne fu pas escrite por perece . et il encerchoient toz les estranges .et ceste estuide n’est pas legiere ne novele. ainz est buene. et acianne. mes neglience qui tout destruit l’a corrompue petit. et petit. tant que nos avons aparceu au derrenier que ce estoit profitable chose. et l’avons amené de rechief a la chose commune . et autresi comme nos volons. que il et ses offices ne soit pas corrompuz . et que il ne praigne rien par dessus ce que nos avons dit. commandons nos que il soit gardé sanz damage. si que il ne soit contraint de rien paier par nule achoison. ne en nostre saint palés. ne en ta cort. ne ore ne el tens qui est a venir. mes les choses que nos li avons donnees li soient purement gardees en toz cas. car il est droiz que la dignité qui governe toutes choses. avenant[f. 76d]ment soit par desus toutes les autres. [epil.] Ta hautece s’entremete donc de mener a effeut. toutes les choses qui plesent a nostre hautece. et l’ot nostre porveance. par qoi nos establissons une novele dignité. et avons en toutes choses cure de noz sormis.

I. C. 10.65-78

[C. 10.65]Cist tytres est del legacions (rubr.)
[65.2]Cil meisme empereeur dient. Por ce que vos avez receu en vostre propre non. depensses por la commune defensse. Li oir a vostre compengnon n’est pas tenu a rendre. ce que il en avoit receu. Mes se il est issi que il doient avoir restitucion. il doivent randre a la chose comune ce que il ont eu. [1] Mes se cele quantité estoit establie a ceus qui feroient cel office. vos n’avez pas tort se vos reqerez que cele quantité soit randue a vos qui devez qui devez fere l’office. [2]et vos poez acuser celui que vos dites que il a lessié l’office. de ce que il a guerpie la legacion qui li fu bailliee.

[65.3]Li empereeur dyoclecian . et maximians dient. Il a esté establi. que cil de cest païs qui sont envoié outre mer en legacion soient par .ii. anz quite de servises citeains et d’aneurs [f. 150b]et non pas cil qui prés de leur païs servent a la chose commune

[65.4]Li empereres costentins dit Tuit cil qui ont aucunes dignitez. en quel maniere que ce soit soient tenu as servises citeains. enneurs citeaines. et au servises. que li commun preu ne soient perdu par coverture de covenanz

[65.5]Li empereeur dyoclecians et maximians dient as prevoz d’illire. Se aucuns conseulz est demandez. quant l’en nos veut envoier legacion. ou mander aucune chose. a votre siege. ce a qoi tuit s’acorderont³ par commun conseill. ne soit pas aporté en la cort au juge ordinaire. [1]et nos vos enquerons⁴ que vos ooiz et enqueroiz les desirriers a celx des contrees qui demandent sovant necessaires remedes. si⁵que il soit en ton jugement asquiex tu doiz aidier par toi. et les quiex tu doiz envoier a nostre hautece. [2]et sentence soit donnee en commun lieu del commun preu a ceus des contrees . et ce que li assantemenz de la gregnor partie loera soit confermé par⁶sollempnel auctorité

[65.6]Li empereeur dyoclecians et⁷ theodoses dient Toutes les foiz que legacion nos est envoiee de la cité d’alixandre. Nos commandons que tuit li curial. qui sont en la cité s’assemblent. a la cort. se il ne sont escusé par maladie. ou par autre cause necessaire. et dient ce qui leur semblera droit. et l’escrivent a leur propre main par devant le prevost d’esgypte. si que cil qui feront leur requestes. aportent o elx les letres curiaux⁸. et la legacion qui nos sera envoiee⁹ soit ordenee¹⁰ par devant toi.

[C. 10.66]Cist tytres est de l’escusement as menesteriez (rubr.)
[66.1]Li empereres costentins. dit. Nos commandons que li menesterel de divers mestiers qui demeuront¹¹ es citez soient quite de toz servises : et oiseuse leur soit deonné por aprandre leur mestiers [f. 150c] se il en vuelent aprandre. plus que il n’en sevent. ou ensegnier leur enfanz ce sont cil qui font les mesons. li mire li painteur¹². li entailleeur de fust ou de marbre. et li serreurier et li charon et li edefieeur¹³et li orfevre. et cil qui font les uuevres d’arain. et li fondeeur et li seeleeur. et li portier et li verrier. et li plommier et li peletier. et li folon et li charpentier et autre divers menesterel.

[66.2]Cil meismes empereres dit Li menesterel et li mesureeur des terres. et cil qui font les mesons qui partent les terres . et mesurent. et il font noviaux edefiemenz et cil qui font noviax conduiz d’eve. soient quite de toz servises. et praingnent des autres a ensegnier tant que il en i ait assez.

[C. 10.67]Cist tytres est d’apeler les melleurs as offices (rubr.)
[67.1]Li empereres antonins dit Se tu es apelez as servises citeains et tu il veus nommer autre. qui i soit miexdres que tu n’es. met en avant¹⁴ ta cause.

[C. 10.68]Cist tytres est se aucuns est nommez par haine a aucun office (rubr.)
[68.1]Li empereres alixandres dit Se tu es nommez as¹⁵ servises citeains. la leauté au prevost. fera que cil nommemenz ne te nuira pas. car il apartient au comun profit. que li nommement ne soient pas fet par haine mes par verai jugement.

[C. 10.69]Cist tytres est de recovrer les depenses (rubr.)
[69.1]Li empereres Gordians dit Se tu as .v. enfanz vis tu ne seras pas¹⁶ des servises citeains. qui sont enjoint as personnes. et se aucuns t’a apelé¹⁷ a servise contre cest priviliege pour traveillier toi. et tu as apelé encontre. et tu en es aseurez. tu recoverras les despens que tu as fez el plet seur ceux qui t’i ont nommé.

[C. 10.70]Cist tytres est se aucuns muert ainz que il oit receu l’office a quoi il fu nommez (rubr.)
[70.1]Li empereres Gordians dit Se tes peres morut le jor¹⁸que il devoit recevoir l’aneur ou le servise. li prevoz de la contree savra bien que il ne con[f. 150d]vient pas que si oir soient tret en cause en cel non.

[C. 10.71]Cist tytres est des notaires et des escrivains¹⁹ (rubr.)
[71.1]Li empereres costentins. Nus des notaires ne des escrivains ne de leur fiz ne soit mis en leur²⁰ servise. mes il soient retret de toz servises. neis se il²¹ les font dedanz nostre palés. portant que il n’i aient esté .v. anz. et soient randu a leur offices.

[71.2]Li empereres Gordians dit Se aucuns des curiaux se met a recevoir les cens. il aient la condiction que il aime. ele est del²² tout de la dignité de s’ordre. se il est besoinz que il soit sozmis a enqueste

[71.3]Li empereres Gracians dit Nos establissons par general loi. que se il est besoinz de fere notaires. a toutes les contrees generalment ou a chascune cité par soi. franc hom il soient ordené. Ne nus ne soit de ci en avant apelez²³ a cel office qui soit redevables a servage²⁴. [1]et se aucuns des segnors otroie. que ses sers ou ses coutiverres face communes chartres. car nos volons que cil qui s’i assentent soient obligié. et ne mie cil qui rien n’en sevent. il soit tenuz por les choses que li sers ou li coutiverres a fetes. a rendre les deperz a la chose commune . et li sers soit batuz por son mesfet. et soit d’ilec en avant sers a la borse l’empereeur. Quer il apartint as segneurs que il porveissent au commencement que li privé servise. ne fussent assemblé²⁵ au communs fez.

[71.4]Li empereres theodoses dit Tuit cil qui doivent estre sormis as communs besoinz commant que il soient apelé. ne doivent estre²⁶ apuié a nul aneur ne par nul previliege. ainz doivent estre contraint de soutenir leur fortune selonc la forme des lois. si que l’en ne nuise point as communs profiz que il ne soient point[f. 151a] amenuisié. et il²⁷ soient rendu a leur offices qui il sont estraint par leur obligement. ou par cel a leur peres ou a leur ancesseurs.

[C. 10.72]Cist tytres est des receveeurs des detes a la borse l’empereeur (rubr.)
[72.1]Li empereres costantins dit Nos commandons que cil qui doivent recevoir les communes rentes. les recevent sanz nule demeure. [1]Quer se cil qui les doit recevoir despit celui qui les veut paier. cil li doit offrir par devant tesmoinz. si que quant ce sera prové. il soit quites des mesfet de la seurtenue. et cil qui ne vost recevoir ce qui estoit deu a la borse l’empereor. soit contrainz par l’office au prevost. de rendre le a doubles. [2]et se li juges est negligenz de contraindre les receveors de paier le double. il sera paiez del chatel au juge

[72.2]Cil meimes empereres dit. Cil qui nomment les receveeurs des rentes a la borse l’empereeur . et les autres baillis soient selonc les ancianes lois. tenu a respondre. se cil que il nomme. ne sont convenable. Ne il n’achatent nule chose de leur sustence par autre personne.

[72.3]Cil meimes empereres dit Cil qui sont novelement establi a estre receveeur des rentes a la borse l’empereeur. ne recevent pas tant seulement les detes de l’an presant. mes les arrierages de l’an devant.

[72.4]Cil meimes empereres dit Nus qui oit esté en l’office de recevoir les rentes a la borse l’empereeur. ne soit contrainz de prandre derechief cele meisme office. devant que il ait randu conte de l’an devant. Quer il n’est pas droiz que l’en grieve cex qui bien i ont fet. ne ce ne seroit pas sens. que l’en il tenist ceus qui i ont mesfet²⁸. [1]Quant li anz sera donc passez cil qui ont receu les rentes soient contraint de dire en qoi il ont despendu les choses [f. 151b]que il ont receues si que se aucuns est entrepris que il ait fet larrecin il puisse plus legierement rendre le damage tant comme il²⁹ sera noviax. [2] ne il ne soient³⁰ pas tenu pardurablement. en la poosté de grever ceux des contrees. ainz soient mué chascun an par la soutillité as juges se la costume de la cité ou l’autorité de l’ordeneeur ne les contraint d’estre par deus anz en cel office.

[72.5]Cil meimes empereres dit. Li froment qui sont osté des guerniers l’empereeur soient maintenent mis en escrit. et por quoi il en ont esté osté³¹et l’en ne mete es guerniers l’empereeur fors les fromenz qui apartiennent a la borse l’enpereeur.

[72.7]Li empereres Gracians dit. Cil qui recevent les rentes a la borse l’empereeur. ne les tiegnent pas longuement en leur otiex. mes ce que il recevront de cels des contrees soit maintenent mis es sainz tresors.

[72.8]Cil meimes empereres dit li quilleeur et li receveeur des rentes soient confermé par l’assentement de tote la cort. et par le jugement a toz³²et li nons a ceus qui sont mis et establi es communs offices. soient fet savoir au governeeurs des contrees . et sachent que ce que il nommeront. mesferont³³ apartendra a leur perill.

[72.9]Cil meimes empereres dit Nos avons commandé que mui et setier d’arain . et de pierre. et pois soient mis par chascune cité. et par chascune mansion. si que chascuns de ceus qui doivent les treuz sache que il doit donner as receveeurs. ou se aucuns des receveeurs passe la mesure des muis. ou des setiers ou des pois. sache que il en soffera painne avenant. [1]et les choses qui ont esté fetes jusque ci contre le preu a toz les pueples soient abatues et nos commandons que l’en doint [f. 151c] as receveeurs la cinquantismes part del froment. et la carantisme de l’orge. et la vintiesme de vin et del lart. [2]et nos sommes commeu par humanité et commandons que li receveeur d’armone qui sont loigtieng [sic]. aient la qarantisme part del froment et de l’orge. et la quinzisme³⁴ del vin . et del lart.

[72.10]Cil meimes empereres dit. Li receveeur estrivent par devant les defendeeurs. la maniere de la force as porseors et toutes les especes et le nombre et la quantité.

[72.12]Cil meimes empereres dit. Se l’en aparçoit que aucuns de ceus qui revent³⁵ les rentes. l’empereeur ou des notaires³⁶. ait fet aucun barat. quant il en sera convaincuz. il ne soit pas de rechief apelez a cel office. en qoi il a mesfet. neis se il en a enpetré noz letres par celee requeste.

[72.13]Cil meimes empereres dit Nostre hautece a commandé que dui notaire et dui receveeur. soient establi en chascune contree. [1] E nos volons que la grant prevosté sache. que cil qui³⁷ recevent l’or qui est dounez a l’empereeur. ne doivent avoir nule communité o elx qui recevent les contes de noz rentes. et li juge des contrees seront puni de .v. lb. d’or³⁸. et li primat des osfices sofferront. paine capital se ce n’est gardé.

[72.14]Li empereres. honoires dit Nos ne volons pas que li curial soient enbesoignié de bas offices. ne de servises que il ne doient. que li communs preuz ne chanciaut

[72.15]Li empereres theodoses dit. Se aucuns de ceus qui tienent de nos aporte l’or ou l’argent. que il nos doit. cil qui est establiz a recevoir noz rentes le receive. si que li governeires de la contree et ses offices sache que li cimes³⁹ sera suens se aucuns domages est fez as porseeurs por la desleauté⁴⁰ des pois. [1]et tout ce qui des contrees⁴¹ est envoié a nostre tresor soit aporté as nobles homes⁴² qui en sont[f. 151d] mestre

[C. 10.73]Cist tytres est des pesceurs⁴³ de l’or (rubr.)
[73.1]Li empereres costentins dit Se cil qui nos doivent treuz aportent or. et il le vuelent peser ou en deniers ou en mise⁴⁴ il soit pesez a leal pois.

[73.2]Li empereeur dyoclicians et maximians dientToutes les foiz que doutence nest de la qualité de deniers. Il nos plest que uns hom leaus et sages qui ne deceive ne ne soit deceuz departe le contenz

[C. 10.75]Cist tytres est que nus ne porprengne les choses qui sont receues des communes rentes (rubr.)
[75.1]Li empereres costentins dit Nus des juges ne s’esfort⁴⁵ d’envaïr par non de prest ce que il receit de la chose commune.

[75.2]Li empereres Gordians dit Nus hom⁴⁶ ne porpraigne por nul tytre. nules des choses qui sont repostes en nostre tresor. se il n’en a par avanture commandement de ceus qui li pueent donner

[75.3]Li empereres archades dit Li juge sachent que il ne loist a nul a metre en autre besoinz ce que il receit des choses qui apartienent a la chose privee. se il ne veut que sa licence soit refrenee par grief sentence.

[C. 10.76]Cist tytres est de l’or qui est dounez por le queronnement l’empereor (rubr.)
[76.1]Li empereres Gordians dit. Il nos plest que nus ne soit contrainz de paier l’or qui est dounez por le queronement l’empereeur. fors cil qui le doivent par costume.

[C. 10.77][77.1]Li empereres honoires dit. Cil qui sont establi par les contrees a fere pés et repos et a tenir concorde en toz les ceiteens⁴⁷ soient ordené par les curiaux tel que il soient convenable par le jugement as privez⁴⁸ des contrees

[C. 10.78]Cist tytres est del pris de l’argent qui est deuz a l’empereor (rubr.)
[78.1]Li empereres archades dit Nos comandons que chacuns oit pooir de paier or por la some de l’argent que il devoit paier. si que il doint por chascune livre d’argent .v. s. d’or

II. C. 12.1

Cist tytres est des dignitez (rubr.)
[1] Li empereres dit a severiane. Se votre aielx fu contes et vostre peres prevoz sicomme vos proposez. et vos ne vos estes pas mariees a hommes de basse condicion. mes a nobles. vos recevez la noblece de vostre linage

[2] Li empereres costentins dit Les portes de digneté ne seront pas overtes a ceus qui sont acusé de crimes. ou qui sont de vilainne vie. ne a ceux qui malvese renomee depart de la compengnie as honestes homes.

[3] Cil meismes empereres dit La gregnor dignité ne doit grever nul homme. envers les privilieges de sa premiere dignité ou de sa chevalerie

[4] Li empereres costanz dit Nos commandons que les sustences au senateurs que il porsieent en divers lieus et en diverses contrees . et leur home soient franc. et quite de toutes les choses que li juges prannent des autres par leur autorité. et de toz vilains servises. qui avienent par dehors. ne il ne soient contraint de nul servise que il ne doient ;

[5]Cil meismes empereres dit Nus prevoz de ceste cité ne sozmete senateur a nus nombre. sanz nostre commandement et sanz nostre seu. Ne nus ne face grant tort a nostre cort. [5.1]et se aucuns dignité de senateur l’en doit demander savoir mon se il sera mis en autre dignité.

[6]Cil meismes empereres dit. Nus des vilz marcheanz ; ne des monoiers ne des bas offices. ne [f. 169c] de ceus qui sont ententif. as vilains gainz. n’essait a user de nule dignité ; et se aucuns i est entrez il en soit mis hors . et il convient que cil qui en sont mis hors. soient a leur propres compungnies.

[7]Cil meismes empereres dit. Porce que divers juges vuelent que l’en face aucunes uevres en aucunes citez. la sustance as senateurs ne soit pas apelee a cest besoing

[8]Li empereres Julians dit. Il convient que nos defendons de toz tort fet la droiture as senateurs. et l’autorité de cel ordre. en coi nos contons nos meismes

[9]Li empereres valentins dit Nos ne defendons pas que li fill a ceus qui ont esté franchi ne puissent recevoir noble dignité.

[11]Li empereres dit Senateurs ou autres nobles hom puet bien avoir enfanz de basse condicion . sicomme ceus que il a euz ainz que il receust la dignité. et ce n’est pas establi es filz tent seulement. ainz doit autresi estre gardé es filles. [11.1]et porce que il ne convient pas que les aneurs au peres nuisent as filz. l’en doit savoir que cil qui est nez de senateur. ou d’autre noble home. doit estre en la dignité son pere

[12]Li empereeur valentins et theodoses dientLi jujes qui sont convaincu de larrecins ou d’autres crimes. soient despoillié de toute leur aneur ; et soient conté entre les plus malvés et les plus bas. Ne il n’aient pas esperance de revenir aprés a cel aneur dont il ont mostré que il ne sont pas digne

[13] Cil meisme empereeur dient Nos sorhauçons les fames de l’aneur a leur mariz. et les ennoblissons par leur lignage. et establissons que eles pledent en la cort ou il pueent pledier et chanjons leur menoirs. et se seles se marient aprés a homes de plus base ordre. eles sont estrangiees de la premiere dignité. et ensivent la condicion as derreniers mariz

[14]Cil meime empereeur dient. Nos [f. 169d]commandons que li juge n’aient nule poosté d’enjoindre aucun commun serise a senator qui soit en aucune contree.

[15]Cil meime empereeur dient. Nos donnons a toz les nobles homes poosté d’aler s’en en la terre. ou il furent ne ou ailleurs sanz rien paier. et de demorer la ou il vodront.

[16]Cil meime empereeur dient Se aucuns qui soit en dignité fet .i. grant mesfet nos commandons que la personne qui fet le mesfet soit gardee hors de chartre. et se ce est des plus nobles. la chose soit raportee a nos. et se ce est de ceus qui sont en meneur dignité. ele soit raportee a ta quenoissence. si que l’en juge quel chose il convient establir del crime qui a esté fez.

[17]Li empereres zenons dit Toutes les foiz que il convient que cil qui sont es dignitéz. doivent estre tret en cause par la reqeste a aucun bas homme. qui les veut enpleder ou criminalement ou citeainnement. il ne soient pas contraint de donner pleges. d’atendre le jugement. ainz aient leur especial priviliege qui soient creu par leur leauté. si que l’en ne praingne d’ex que leur serement ; [17.1]et se il despiseent le serement et il ne vuelent venir a jugement. ou par eux ou par leur procurateurs. se la cause est meue por chatel. li juges ordenera de la possession des choses. qui apartiennent a lui ce que l’autorité de droit. et la qualité de la chose li amonestera. et se la cause est criminal. il soit despoillié : de la dignité que il forfist quant li se parjura. et il lise au juge a mostrer sus lui la force de la loi. sanz demander nos en conseill. por ce que il est despoilliez de sa dignité par son mesfet. [17.2]et nos ajongnons as privilieges as nobles dignitez. et nus juges ne les puisse semondre en cause citeaine ne en criminés sanz nostre congié.

[18]Li empereres anastaises dit Nos commandons que[f. 170a] il lise a toz ceus. qui sont es gregneurs dignitez ; ou es meneurs. et as nobles anorez qui de ceste cité sont alé es contrees. par nostre commandement ou qui ont leur habitacion que se il ont besoing de venir a ceste real cité. il li viegnent sanz estre rapelé.