« Herveus1, comes Nivernensis, universis presentes litteras inspecturis, salutem. Universitati vestre notum facimus quod karissimus frater noster Raginaldus de Monte-Mirabili2, ad sepulchri dominici visionem quondam Jerusolimam prefecturus, cum itineris esset in procinctu, pia motus animi consideratione, quinquaginta solidos reddituum ecclesie Beate-Marie Carnotensi, in perpetuum, contulit et concessit3. Nos autem hanc collationem ratam habentes et acceptam Domino considerantes, ampliori eam beneficio curavimus augmentare, videlicet centum et decem solidos, cum predictis quinquaginta, in pedagio nostro de Aluia, singulis annis, in Purificatione beate Marie, percipiet ecclesia memorata. Ad reddendum autem eos Capitulo dicte ecclesie obligabitur juramento quisquis erit pedagiarius ibi pro tempore, sub tali conditionis tenore quod si eos non reddiderit ad terminum supradictum, pro singulis septimanis quibus eos reddere differret quinque solidos dicto Capitulo, de pena et recto, persolvet. Insuper etiam homines, terras et villas dicte ecclesie, istas scilicet : Genervillam, Ronciam, Colummers, Prata et Husseium, ab omnimoda justicia et consuetudine, corveia et exactione qualibet quitamus, retentis tantummodo redditibus tensamenti quos pro terra tensanda singulis annis habebimus4, et feodis illorum qui a nobis tenent, et tali pedagio cujusmodi ab hominibus predictarum villarum nobis debetur ; approbante et concedente tam donationem quam quitationem predictas karissima uxore nostra Matilde comitissa. Memoratum vero Capitulum, ad instantiam nostram, duo anniversaria, unum pro nobis, reliquum pro predicto fratre nostro, singulis annis, in eadem ecclesia misericorditer et benigne facienda concessit. Preterea, ad majorem cumulum karitatis, idem Capitulum nobis concedens, diebus singulis, missam unam de Sancto-Spiritu, quamdiu vixerimus, et post decessum nostrum, pro anime nostre et amicorum nostrorum remedio, in perpetuum celebrandam, in uno ecclesie oratorio, videlicet in oratorio Beati-Stephani, assignavit. Quod ut ratum, inconcussum et stabile permaneret, presentem paginam inde notari fecimus et sigilli nostri munimine roborari. Datum anno incarnati Verbi millesimo ducentesimo nono, mense maio. »