« Galterus, Dei gratia, Carnotensis episcopus, omnibus presentes litteras inspecturis, salutem in Domino. Cum dilectus filius Milo, Carnotensis ecclesie capicerius et sacerdos, ex devotione speciali, propter excellentiam tante rei, cereum continue, nocte dieque, ardentem deputasset ante sacrosanctam Eucaristiam in ecclesia Carnotensi, supplicavit humiliter et devote nobis et Capitulo Carnotensi quatinus statuere dignaremur quod quicumque pro tempore futurus esset Carnotensis capicerius de predicto cereo servire predicto modo in perpetuum teneretur. Nos igitur, attendentes capiceriam Carnotensem, que satis habundat, ex hoc nullatemus onerari, sed potius honorari, pro tanti reverentia sacramenti, pie peticioni prefati capicerii benigno concurrentes assensu, volente, approbante et expresse consenciente Capitulo Carnotensi, cum eodem publice statuimus ut quicumque de cetero fuerit capicerius ecclesie Carnotensis de prefato cereo ante corpus Domini servire predicto modo in perpetuum teneatur, et ad idem servitium fideliter toto suo tempore peragendum dictus Milo capicerius, coram nobis presens in ipso capitulo, Capitulo se astrinxit. Erit autem iste cereus ejusdem ponderis et valoris cum cereis qui super altare beate Virginis ante sacrum ipsius scrinium accenduntur, et semper renovabitur quociens eosdem cereos contigerit renovari. In cujus rei testimonium et firmitatem perpetuam, presentes litteras sigilli nostri munimine roboratas, ad petitionem dicti capicerii, dedimus Capitulo Carnotensi. Actum anno Domini millesimo ducentesimo tricesimo primo, mense octobri. »