Confirmation de la vente de la dîme de Buters.

  • B Arch. nat., LL 1030, n° 25.
  • a Recueil des chartes de l'abbaye royale de Montmartre, éd. Édouard de Barthélémy, Paris, 1883.
D'après a.

In nomine sancte et individue Trinitatis, amen. Ego Ludovicus Dei gratia Francorum rex. Conventiones et contractus qui fuerint inter ecclesiasticas et seculares personas, quando ad nostram venerint audientiam, dignum est illa commendari memorie, ut descripta veritate negocii, perfidia eorum qui nocere cogitant necessitate cognite veritatis obmutescat. Notum itaque sit universis presentibus et futuris quod Rainaudus de Camptembro et Robertus frater ejus invadiaverunt decimam suam de Buters ecclesie Montis-martyrum per manum abbatisse Ade pro quater XX libris parisiensibus, et deinde, cum Robertus esset ultra mare, Raginaudus locutus cum abbatissa transegit de jam dicta decima, quam concessit ecclesie in venditionem acceptis inde XXV libris de caritate ecclesie, tali quidem modo, quod si Robertus rediens moverit calumpniam vel aliquis umquam alius, Raginaudus venditionem garentabit, et si non poterit garentare, decima sicut prius remanebit in pignore pro quatuor XX libris, et Raginaudus pro illis XXV libris XL ecclesie persolvet, quarum plegii sunt amici sui et hanc summam coram nobis fiduciaverunt se reddituros, Johannes scilicet de Colentiis XX libras, Bartholomeus de Auveso X libras, Petrus de Alneto C solidos, Adam de Sorel C solidos. Contractus iste recitatus fuit ante nos et rem laudavit Teudo de Namtolio, de cujus feodo decima esse dinoscitur, et quod tercius dominus, Odo scilicet Male-Herbe rem istam concesserit, certissime asseruit prepositus de Capella Gaufridus. Ceterum ipsi nos laudantes contractum pro amore ecclesie cui multum favemus, conscribi, et sigillo nostro muniri fecimus, addito karactere nostri nominis. Actum publice Parisius .