De quadam controversia de Morgnevalle.

Universis presentes litteras inspecturis Dominus Gervasius de Suessione capellanus perpetuus Ecclesie de Morgnevalle, et Magister Nicholaus canonicus et officialis Silvanectensis, salutem in Domino. Noverit universitas vestra quod orta contentione inter religiosas mulieres abbatissam et conventum de Mornevalle ex una parte, et domum et capitulum S. Reguli Silvanectensis ex altera, super tertia parte decime vini de vineis que movent de censiva Bernardi de Cruce ubicumque sint et super tertia parte vini quarumdam vinearum, consistentium apud Morgneval et villas adjacentes et super campiparte duorum arpennorum terre site in monte de Bethencourt quam tenet ad presens Gila relicta Helini de Bethencourt. Tandem dictis partibus in nos compromittentibus et promittentibus sub pena viginti librarum Parisiacum se servare firmiter et tenere quicquid super hoc sive decisione querele decreverimus. Nos, cause momento, plenius intellectis, die ad proferendum arbitrium partibus assignato, partibus per procuratores comparantibus, dictum nostrum protulimus in hunc modum. Super campiparte et decima duorum arpennorum terre in monte de Bethencourt quam tenet Gila relicta Helini et super tertia parte decime vini sex arpennorum vinearum apud Frenoy juxta Granchiam Abbatisse, decano et capitulo sancti Reguli nomine dicte Ecclesie silentium imponimus, Abbatissam et Conventum ab eorum impetitione, quantum ad hoc contentialiter absolventes. Super tertia vero parte decime vini de vineis que movent de censiva Bernardi de Cruce, ubicumque sint, et de vineis Watiervoisin, apud Loncmesnil, apud Helyncourt et apud Fresnoy, exceptis duntaxat sex arpennis predictis, sita, duximus ordinandum locis predictis pacifice percipiat et habeat et inde suam plene faciat voluntatem. Abbatisse, et conventui silentium imponimus, decanum et capitulum nomine ecclesie sancti Reguli ab impetitione earum quantum ad hoc sententialiter absolventes.

Hec autem omnia et singula sub pena in compromisso apposita a dictis partibus precipimus observari, et ne super hoc in posterum dubitetur, presentibus litteris sigilla nostra duximus apponenda. Nos vero, dicte abbatisse et conventui de Morgneval ordinationem istam acceptantes et ratam habentes presentes litteras sigillis nostris duximus sigillari.

Actum anno Domini MCCXLVIII mense martio.