Omnibus presentes litteras inspecturis officialis curie Aurelianensis salutem in Domino. Noverint universi quod in nostra presentia constitutus Gaufridus de Malemuce, armiger, primus dominus feodalis, ut dicit, cujusdam decime site in parrochia de Noemio in vino et blado et aliis fructibus, que decima quondam fuit Johannis Garnaut, admortificavit ad opus decani et capituli Aurelianensis et promisit per fidem suam in manu nostra prestitam quod contra dictam admortificacionem jure hereditatis sive quolibet alio jure per se vel per alium non veniet in futurum. Immo promittit dicta fide se garentiturum, liberaturum et deffensurum tamquam primus dominus feodi dicte decime predictam decimam perpetuo decano et capitulo superius nominatis. Confessus est etiam coram nobis in jure dictus Gaufridus quod recepit a dictis decano et capitulo pro dicta amortificacione septem libras turonensium de quibus se tenet plenarie pro pagato. Et confessus est quod dicti decanus et capitulum de predicta amortificacione se plenarie satisfecerunt. Dictus vero Gaufridus quantum ad predicta et singula jurisdicioni nostre se supposuit, et promisit per fidem quod dabit decano et capitulo predictis litteras decani Blesensis de pactionibus antedictis. In cujus rei memoriam et testimonium presentes litteras sigillo Aurelianensis curie duximus roborandas. Actum anno Domini millesimo ducentesimo quinquagesimo nono, die veneris post Circoncisionem Domini.