A touz ceuls qui verront cestes presentes lettres le baillif de Blois salut en Nostre Seigneur. Sachent tuit que monseur Raoul de Cheneveres, chanoine d'Orliens, a reconneu en droit par devant moy que il, de sa bonne volenté, a donné par don fet sollennement entre vis et senz pansée de james rapeler, a Pierre, son neveu, filz Brunete, seur audit monseur Raoul, tout quanque ycelui monseur Raoul a es parroisses de Fontaines, de Courmamain et de Braceos, soit en mesons, en terres, en prez et en quelconques autres choses que ce soient, a tenir, a avoir et a percevoir lesdites choses données doudit Pierre ou de son commandement tant comme ycelui Pierre vivra tant seulement ; et après le deces doudit Pierre, ledit monseur Raoul a volu, ostroié et acordé par devant moy en droit que toutes les choses données dessus dites soient et demeurgent a touz jourz mes a heritaige au deian et au chapistre de Sainte Croez d'Orliens et au chapistre de Meun, a chescun d'iceuls chapistres pour la moitié, a tenir, a avoir et a poursoair, a vendre, a esploitier et a en fere toute leur volenté de euls, de leur successeurs et de ceuls qui cause y auront de euls, si comme il leur plera et il verront que il sera a fere. Desqueles choses données dessus dites ledit monseur Raoul s'est desseisi et desvestu de tout entout par devant moy en droit, et gie, a sa requeste et de sa bonne volenté, en ay soisiz et vestuz ledit Pierre et lesdiz deian et chapistres par le bail de cestes presentes lettres, sauve l'uffruit des dites choses données audit monseur Raoul sa vie, en quelque estat que il soit, soit en religion, mendient ou en autre. Et quant a tout ce dessus dit fere et accomplir loiaument senz venir encontre, ledit monseur Raoul en obliga par devant moy audit Pierre et as diz deian et chapistres, a leur successeurs et a ceuls qui cause y auront de euls, soy et ses hoirs et touz ses biens muebles et non muebles, presenz et avenir, en quelque leu que il soient et que il porront estre trovez, renoncent quant en cest fet ledit monseur Raoul par sa foy a touz privileges, graces et benefices quex que il soient, donnez et a donner, a toute excepcion de decevance, a toutes autres exceptions, barres, cauteles, deffenses, resons, cavillacions et allegacions, a tout us et a toute coustume de pais, a tout aide et a tout benefice de droit escript et non escript, et au droit qui dit que generau renonciacion ne vaut pas, et en suppose quant a ce soy et ses biens a la juridiscion de la court de la contée de Blois en Blesois senz autre court avoer. En tesmoing de laquele chose gie fet seeler cestes lettres dou seel de ladite court de Blois. Ce fut fet l'an de grace mil deus cenz quatre vinz et seze, le semadi après la saint Denis.