A toz ceuls qui ces letres verront et orront, frere Adam humble prieur de Notre Dame de Gornoi et tôt le convent de cel meismes leu, salut en nostre Seignor. Nous feson a savoir que comme nous, por nostre prioré et por totes les apartenances de cele prioré et noz hostes de la vile de Rossi, aions et avons eu de toz jorz pesiblement, tote maniere d'usage en la forest de Rossi qui est de nobles homes monseignor Almauri de Meullent, seignor de la Queue, Gobert d'Argies, seignor de Guitebuef, Yde sa fame, Guillaume des Essarz sire de Ambleville97, Ysabel sa fame, Aubert de Longueval sires de Croissi97 et Anne sa fame, chevaliers, du don de lor ancessors, du confermement du Roi de France, de l'Evesque de Paris et de l'Apostoile, et li devant diz chevaliers et lor fames nous aient donné pour nostredit usage vi^c arpenz de bois a nostre part, tenassy au bois qu'ils ont doné à l'abbé de Fossez et au convent et a noz dis hostes 320 arpenz joignanz de noz bois devant diz, par certaines bones devisez, franchement et quittement en main morte, sanz riens retenir en iceulz, sanz coaction de metre riens hors de nostre main ; nous, por le profit de toutes les parties, por nous et por noz successors, et noz diz hostes en nostre presence establiz por euls et por lor successors, et par lor foi donée de lor cors en nostre main, quittons aus devant diz chevaliers et à lor fames et à lor hoirs et à lor successors, a religieus homes a l'abbé et au convent de Fossez, et à lors hostes du chastel de Torci, à noble home Thibaut, conte de Bar, et à ses hostes de Torci et à toz autres qui reson i puissent et doivent avoir, quitons tot le remanant la devant dite [forest]a a toz jorz mes, por les iii^c arpenz de bois en nostre part et por les 320 arpenz de bois à nos hostes, lesquelz 320 arpenz de bois cil diz hostes tendront de nous et de noz successors à xii d. de fonz de terre, à paier chascun an à le St-Remi par la convenance qui est entre nous et les diz hostes, de l'assentement et de la volonté aus devant diz chevaliers et de lor fames ; et prometons en bone foi, por nos et por noz successors et noz dis hostes, por euls et por lor successors, qui encontre ceste quitance ne vendrons par aucune rason ; ainçois lors prometons à porter droite garantie de nous et de noz successors et de noz dis hostes et de lor successors, à toz jorz mès, sanz jamès riens reclamer en remenant de la forest devant dite ; et lor en avons doné cez présentes letres séelées de noz seaus, en confermement de choses dessusdites.

Ce fut fet l'an de l'Incarnation Nostre Seignor 1275, ou mois de avril.