Vente par les enfants du chevalier Hue de Poiz.

Nous Jehans de Poiz, Robert de Poiz, damoisiaus, freres, et nous damoiseles Felipe et Ennes lor serours, enfans mon seignor Hue de Poiz mort, fesons savoir à tous cex qui ces presentes letres verront et orront, que comme nous fussions vij enfant et eussions entre nous vij ensemble la seignorie &le tresfons de ij. masures, que Richars de Liex et Symons li Josnes vendirent a noble homme Loeys par la grace de Dieu roi de France, por la Meson Dieu de Pontoise, lesqueles masures sont assises entre la devant dite Meson Dieu d'une part et la meson qui fu Pierre le Josne d'autre ; Nous IIII devant nommés avons vendu nos iiij parties et quittiées a la devant dite Meson Dieu de Pontoise pour XI liv. et VIII sous et VI deniers de parisis. Des quiex plains paiemens est fais a nous en argent contez. Et prometons par nos fois fiancées et données corporelment, que des ore en avant en iiij parties des masures devant dites ne reclamerons nous ne nos oirs, droiture ne seignorie, ne autre chose, ne ne ferons reclamer par reson deritage ne de seignorie, ne par nule autre raison ; ains voulons et otroions que la devant dite Mesons Dieu tiegne desor en avant de main morte les iiij parties des devant dites masures. De ces choses nous prometons en nos fois aporter loial garantie à la devant dite Meson contre tous, as us et as coustumes dou pais. Por ce que ces choses soient seures et estables nous avons ces presentes letres scelees de nos seiaus. Ce fu fait en lan de l'Incarnation Nostre Seignor M. et CC. et Lxij en mois de decembre.