Jugement arbitral entre le sire Jehan de Lisle et la Maison-Dieu, au sujet du travers de l'Isle Adam

A tous ceus qui ces presentes lettres verront et orront je Pierres maires de Neelle et je Richars de Chambli bourgeois de Pontoise, saluz en Nostre Segneur. Nous fesons asavoir à touz que comme descorde fust entre noble honme monsegneur Jehan de Lille chevalier dune part, et le mestre, la prieuse, les freres et les sereurs de la Meson Dieu de Pontoise d'autre part, du travers de liaue de Lille que li devant dis maistres, la prieuse, li frere, les sereurs, voloient avoir quite du don que li Rois avoit fait à Champaignes a leur meson, en passant leur biens par la devant dite iaue ; et li sires devant dis disoit que il devoient paier pour ce que leur reseandise estoit à Pontoise. D'autre part de ce que li devant dis mestres, la prieuse, les freres et les sereurs demandoient le conduit de Parmain et de Lille qui sont de la paroche de Joi, ensi comme li Rois en usoit avant que li Rois leur donnast; apres et des vins qui sont charchié à Parmain et à Lille de la paroche de Joi tant comme elle dure, que marchant estrange amainent de dehors par les larris. De rechief li devant dis mestres, la prieuse, li frere et les sereurs demandoient le conduit des vins qui estoient charchié a Parmain et a Lille en la parroche de Joi et estoient mené par le parroche de Lille en liaue, et li sires disoit quil nen dévoient pas avoir. De toutes ces choses li devant dis mesires Jehans et li devant mestre la prieuse li frere et les sereurs se mistrent sur nous de haut et de bas, que nous enquesissions la verité et rendissions le dit, et ce que nous en diriens il entendroient par leur letres seelees dune part et dautre lesqueles furent donnees a lune partie et a lautre. — Ves ici nostre dit par lenqueste que nous avons faite et par le conseil de bonnes genz. Nous disons que li maistres, la prieuse, li frere et les sereurs devant dis doivent poier le travers. Apres Nous disons que trestuit li marcheant qui achatent vin a Lille et a Parmain en la paroche de Joi et les mainent par les larriz doivent le conduit a la Meson Dieu de Pontoise a touz jours par le don que li Rois leur fist. Chascune charete doit II d. Et de ce quil demandoient le conduit des vins qui estoient a Parmain et a Lille en la parroche de Joi et estoient mené parmi la parroche de Lille en liaue Nous disons que il ne nont riens promis. Et pour ce que ceste chose soit ferme et estable a touz jours, Nous a la requeste dune part et dautre lune partie presente pardevant nous, avons seelees ces lettres de nos seaus. Et a ce dit rendre u (au) moustier de Joi dalez Champaignes furent present Messires Symons de Dampont chevaliers. Messires Jehans de Fenix prestres. Mesires Girars prestre de Joi. Sires Raous d' Estampes. Jehans li Cochetiers. Mesires Jaques. J^ehans Clers. La dame de Joi. Poncars de Basoches clers. Ce fut fet en lan de lincarnation Nostre Segneur M. CC. LX. VIII. le samedi prochein apres la translation .