Amortissement par Pierre le Sanglier, écuyer d'Osny.

A touz ceus qui ces presentes letres verront et orront. Piere le Senglier escuier de Oni segneur du fié de la quarte partie d'une masure à Giroucourt entre la masure Richart Dupuis dune part et le jardin Robert Despeluches d'autre part asise, qui est orendroit de la Meson Dieu de Pontoise, et fu jadis Raoul de Pierrelée, saluz en notre Segneur. Je vous fez a savoir quenoisaument que Jehan le Jonne drapier bourjois de Pontoise tenant de moi en fié ce que il avoit en ladite quarte partie de ladite masure, requenut par devant moi que les rentes et les cens, et quanque il i avoit ou povoit avoir en celle partie, movant de mon fié, avoit vendu sanz jamez rien reclameri ne par soi ne par autres, au mestre, a la prieuse, as freres et as sereurs de la Meson Dieu de Pontoise. Derechief ledit Jehan requenut que il vouloit et otroiet outreement que le mestre, la prieuse, les freres et les sereurs de la dite Meson Dieu tiegnent aient et porsaaient desore en avant en main morte ces choses de sus dites et que il en puissent fere leur volenté. Et je iceste vente et toutes ces choses desus nomees vuelg, otroie, apprueve et conferme, et ladite quarte partie quitte et absoilg du tout en tout destre banniere et destre redevable de moudre a ban a mon moulin dit La Roche de Oni, ainsint que la dite quarte partie de la dite masure puisse moudre franchement et quittement la or li plera... et toutes lesdites choses a avoir et a porsair en main morte... ou tesmoing de laquele chose jé ces presentes letres seellées de mon seel. Ce fu fet en lan de grace nostre Seignor mil deus cens et quatre vinz et deus, le joesdi devant Pasques, au mois dawril.