Vente à l'Hôtel-Dieu d'une métairie à Champagne

A tous ceus qui ces presentes lettres verront et orront Adam Halos baillis de Senlis salut. Nous fesons savoir a tous que pardevant Adan de Baerne et Jehan de Senlis bourgois de Biaumont sur Oyse a ce especialment establiz en ice leu du commandement le Roi et du nostre, vint present Raoul Aout de Champaignes et reconnut que il avoit vendu aus freres et as sereurs de la Meson Dieu de Pontoise toute l'action et le droit que il avoit en ij journées de terre que il tenoit a moiteerie a heritage de ladite Meson Dieu, joignant a la terre Jehan de Montegni, pour vint et cinc s. par. siens quités en bonne monnoie bien et leaument contee et nombrée... Et a renoncié a exception de monnoie non eue, non receue, non a li paiée et poursolue et a ce qu'il puist dire qu'il ait esté efforciez ne sourmenez pour faire la vente et la quitance desuz dite, ne qu'il ait esté deceuz de la moitié ne de plus outre juste pris, a toutes autres exceptions, fraudes, decevances de mal et de barat qui contre ces presentes letres porroient estre alleguiés. U tesmoing de ceste chose nous avons seelé ces presentes letres du seel de la baillie de Senlis, a la relation des auditeurs desuz noumez, sauf le droit le Roi et lautrui en lan de grace mil CC quatre vinz et cinc, u mois de may.